Бүген XXXI Дөньякүләм «ӘДӘБИ МАРАФОН» проекты башланды! 

Анда татарча китап укый белгән һәм татар интерфейслы яисә  татар телендә эшләп килгән социаль челтәрләрдә аккаунтлары булган һәркем катнаша ала.

Чарада катнашу өчен проектның ВКонтакте социаль челтәренә керергә һәм, кагыйдәләр белән танышканнан соң, комментарийларда катнашырга теләк белдерергә кирәк: https://vk.com/wall-143856908_29539.

Оештыручыларның исәпләүләренә караганда, әлеге чарадан соң ВКонтакте социаль челтәрендә #ӘдәбиМарафон хэштегы белән урнаштырылган татар телендә әсәрләрдән өзекләр һәм шигырьләр саны 1 миллионнан артып китәчәк. Шунысы үзенчәлекле, Әдәби марафон проектында катнашкан һәркем компьютерларында һәм смартфоннарныда татар клавиатурасы куллана һәм, Интернет челтәрен татар телендә файдалы контент белән тулыландырып, татар телен саклау һәм үстерүдә үз өлешен кертә. Һәр катнашучының тел байлыгы һәм дуслары саны арта һәм алга максат куеп уңышка ирешү шанслары үсә бара.

Проект быел Татнетны үстерү фонды һәм Татарстан Язучылар берлеге тарафыннан, Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән үткәрелә.

ПРОЕКТНЫҢ НИГЕЗЛӘМӘСЕ: https://tat-i.net/tt/adabi-marafon-2025.