1993 елның 14 июлендә Татарстан Югары Советы депутатлары ТР Дәүләт гимнын раслады. Аның көен танылган татар композиторы Рөстәм Яхин язган.

Гимнны ул чагында ТР Президенты Минтимер Шәймиев күрсәтмәсе белән 1993 елда яза башлыйлар. Аңа кадәр республика Дәүләт флагын (1991 елның 29 ноябре) һәм Татарстан Дәүләт гербын (1992 елның 7 феврале) раслыйлар. Гимнны әзерләү өчен Югары Совет каршында танылган татар шагыйре, ТР Югары Советы депутаты Ренат Харис җитәкчелегендәге махсус комиссия булдырыла. Комиссия эшендә шулай ук Казан консерваториясе ректоры Рубин Абдуллин, педагог-виолончелист Афзал Хәйретдинов, Россиянең һәм Татарстанның халык артисты Зөләйха Хисмәтуллина һ.б. сәнгать эшлеклеләре катнаша. Соңрак гимнның иң яхшы көенә бәйге игълан итәләр. Комиссия әгъзалары нота һәм магнит язмаларын җентекләп тикшерә. Тәкъдим ителгән әсәрләр арасында инде танылганнары да була. Шуларның берсе – Салих Сәйдәшевнең «Совет Армиясе маршы», дип яза «Татарстан-24» телеканалы сайты.

2013 елның 21 февралендә Салих Сәйдәшев исемендәге концерт залында Татарстан Дәүләт гимнын халык, шулай ук республика Президенты (хәзер – ТР Рәисе) Рөстәм Миңнеханов, Татарстан Дәүләт Киңәшчесе Минтимер Шәймиев, республика Премьер-министры Илдар Халиков һәм ТР парламентының барлык депутатлар корпусы хозурына беренче тапкыр тәкъдим итәләр. Гимнны, Россиянең атказанган артисты Александр Сладковский җитәкчелегендәге Татарстан Дәүләт симфоник оркестрына кушылып, Татарстанның атказанган сәнгать эшлеклесе Любовь Дрезнина җитәкчелегендәге Муса Җәлил исемендәге Дәүләт академия опера һәм балет театры хоры башкара.

«Гимнның ике дәүләт телендәге сүзләр белән ахыргы вариантын әзерләү бурычы куелды. Моның артында үз республикасына гашыйк күпсанлы белгечләрнең зур хезмәте ята», - диде соңрак парламент спикеры Фәрит Мөхәммәтшин.

Светлана Харитонова соңрак Яхинның «Туган ягым» романсын ничек язуын искә ала. Аның сүзләренчә, ул гимнның көен Казансу буендагы бакчасында язган.

Яхин «Туган ягым» романсының көен Татарстан гимны итеп сайлаулары турында белгәч, уңайсызлана. «Әгәр моның гимн булачагын белсәм, әлеге көйне тагын да яхшырак язган булыр идем», - ди Яхин.

Рөстәм Яхин 1993 елның 23 ноябрендә, аның көен ТР дәүләт символы итеп таныганнан соң дүрт ай узгач вафат була.