Татар мәгарифе порталы
Киләсе елга Казанда ТР Хөкүмәтенең “Алгарыш” грантлар программасында җиңүчеләрнең II форумы узачак. Бу хакта ТР Хөкүмәте йортында узган брифингта “Алгарыш” ассоциациясе президенты Алсу Газизова хәбәр итте.
2008 елның мартында Казанда ТР Хөкүмәтенең Россия һәм чит ил мәгариф һәм фәнни үзәкләрендә кадрлар әзерләү һәм яңадан әзерләүгә “Алгарыш” грантлар программасында җиңүчеләрнең беренче форумы узды, анда 1,5 мең кеше катнашты. Шул чакта Программаны тәмамлаучылар ассоциациясе төзелгән дә инде. Алсу Газизова сүзләренчә, әлегә форумны үткәрүнең төгәл вакыты билгеләнмәгән.
Алсу үзе 2006/2007 уку елында Мәскәү дәүләт университетында “Дәүләт һәм муниципаль идарә” белгечлеге буенча стажировка узган. Алсу хәзерге вакытта Казан дәүләт университеты кафедрасы ассистенты булып тора. Аның фикеренчә, “Алгарыш” программасы республиканың икътисады үсешенә ярдәм итә. “Алгарыш” программасын тәмамлаучыларны тиз карьера үсеше көтә. Без әле үзебезне күрсәтербез”, - дип белдерде Алсу Газизова.
ТР мәгариф һәм фән министры урынбасары Андрей Поминов хәбәр иткәнчә, хәзерге вакытта әлеге министрлык “Алгарыш” программасын тәмамлаучылар ассоциациясе белән бергә алга таба эшкә урнаштыру максаты белән грант алучыларның мәгълүмат базасын формалаштыра. Министр урынбасары ассызыклаганча, программа гамәлгә ашырылган өч ел вакыт эчендә грант алучыларның контракт шартларын бозып, стажировкадан соң республикага кайтмый калган очрагы булмаган.
«Татар-информ» материаллары буенча