Татар мәгарифе порталы
Сез монда
Хөрмәтле кулланучыларыбыз!
Иртәгә, 22 апрель көнне, халкыбыз шагыйре Габдулла Тукай туган Кушлавыч авылында Татнетны үстерү фонды, Татарстан Язучылар берлеге, "Болгар" радиосы, ТР Арча муниципаль районы Башкарма комитеты, Арча районы Мәгариф идарәсе һәм Кушлавыч төп гомумбелем мәктәбе белән берлектә, Татарстан Республикасы Дәүләт Советының Мәгариф, мәдәният, фән һәм милли мәсьәләләр комитеты һәм Татарстан Республикасы Мәгариф һәм фән министрлыгы һәм иганәчеләребез ярдәме белән берьюлы өч зур чара үткәреләчәк:
- "Әдәби җәүһәрләр" I Россиякүләм татар әдәбиятын сөючеләр бәйгесенең финал туры һәм финалистларны бүләкләү тантанасы.
- Кул эшләре сәнгатенең "Әкияттә кунакта" Россиякүләм видео мастер-класслар бәйгесе җиңүчеләрен бүләкләү тантанасы.
- "Чәкчәк шоу"ның ("Болгар" радиосы) "Тукай эзләре буенча" сәфәре.
Әлеге чараларга "Әдәби җәүһәрләр" белән "Әкияттә кунакта" бәйгеләренең җиңүчеләре, язучылар, галимнәр, телевидение, татар газета-журналы редакцияләре хезмәткәрләре чакырулы. Шулай ук, Татарстан Язучылар берлеге чакыруы буенча әлеге тантаналарда Таҗи Гыйззәт, Фатих Әмирхан кебек күренекле шәхесләребезнең оныклары да катнашачак, дип көтелә.
Кызганычка каршы, Татарстан Республикасы Мәгариф һәм фән министрлыгы, дипломнарга кул куйса да, башка зур чаралар үткәрү сәбәпле, район мәгариф идарәләренә чакыру юлларга өлгермәгән. Район мәгариф идарәләренең әлеге исемлекләрдә булган финалистларны - "Әдәби җәүһәрләр" бәйгесе финалистларын һәм "Әкияттә кунакта" бәйгесенең I урын алучыларын әлеге тантаналарга җибәрүләрен сорыйбыз.
Катнашучыларны 22 апрель көнне Арчадан автобус килеп каршы алачак. Ул 7:30 минутта Галиәсгар Камал театры тукталышына килеп туктый, төгәл 8:00 дә автобус Кушлавычка юл алачак.
- 9:00 - 9:30 – Кунакларны каршы алу, теркәлү, иртәнге чәй, мәктәп белән танышу.
- 9.30 - 9.45 – Тукай һәйкәленә чәчәкләр кую, Кушлавыч авыл клубына керү, урнашу.
- 9.45 - 10.00 – Кушлавыч авыл клубында бәйге чараларын тантаналы төстә ачып җибәрү.
- 10.00 - 11.00 – I Россиякүләм “Әдәби җәүһәрләр” татар әдәбиятын сөючеләр бәйгесе җиңүчеләренең финал туры бәйгесе.
- 11.00 - 11.45 – “Әкияттә кунакта” Россиякүләм видео мастер-класслар бәйгесе эшләре белән танышу, кызыклы видео мастер-классларны карау.
- 11.45 - 12.30 – Мәктәптә төшке аш.
- 12.45 - 13.45 – “Болгар” радиосының “Чәкчәк шоу” төркемен каршы алу, алар белән күңел ачу программасы, шигырь укучылар бәйгесе.
- 13.45 - 14.10 – Тукаевларның Кушлавычтагы музей-йортында булу. “Чәкчәк шоу” төркемен алга таба "Тукай эзләре буенча" сәфәренә озату.
- 14.15 - 15.00 – Ике бәйгенең җиңүчеләрен бүләкләү тантанасы, кунакларны озату.
Игътибар! Портал кулланучылары арасында бәйгебезнең барлык җиде викторинасында да актив һәм уңышлы катнашкан, әмма җиңүчеләр исемлегенә кермәгән татар әдәбиятын сөючеләр дә барлыгы билгеле (андый 4-5 кеше бар). Мөмкинлегегез булса, сезне дә әлеге тантанада күрергә шат булыр идек.