Татар мәгарифе порталы
20 гыйнвар, 2009 - 08:53
Күп кенә әти-әниләргә таныш күренеш. Балалар бакчасына яисә әзерлек группаларына махсус тестларны узмаган, тиешле балларны җыя алмаган сабыйларны алмыйлар. Күп очракта сабыйлары сынау үткәндә, әти-әниләр күрше бүлмәдә көтеп утыра. Чөнки бу эшкә тыкшыну имеш катгый тыела. Димәк, 5-6 яше дә тулмаган бала берүзе 5-6 кешелек коммиссия алдында кала, авыр-авыр сораларга җавап бирә дигән сүз.
“Мәгариф турындагы” законда балаларга сынау үткәрү-үткәрмәү искәртелмәгән. Шуңа күрә күп кенә балалар бакчалары, мәктәп җитәкчелеге сабыйларга берсеннән-берсе катлаулы сынаулар уйлап таба. Янәсе, законда ул тыелмаган. Ләкин бит рөхсәт тә ителмәгән. Мәскәү шәһәр Думасына мондый очракларны хәл итүне сорап күп мөрәҗәгать иткәннәр. Ни дисәң дә Россия Федерациясе Конституциясе һәркемгә дә белем алу мөмкинлеген гарантияли. Алай гына да түгел, закон буенча мәктәпкәчә, гомуми урта һәм урта һөнәри белем алу бушлай һәм һәркем өчен дә “ачык” булырга тиеш.
Шуны исәпкә алып, узган атнада Мәскәү шәһәр Думасы депутатлары Россия Федерациясенең «Мәгариф турындагы” законына төзәтмәләр кертү хакында тавыш бирде. Ягъни, алга таба дәүләт һәм муниципаль гомумбелем бирү оешмаларына укучылар конкурс һәм башка төр сынаулар узмыйча гына алыначак.
Депутатлар “Мәгариф турындагы” законга тагын бер төзәтмә кертергә тәкъдим итәләр. Алар фикеренчә, психологик-педагогик диагностиканы да бары теге яки бу уку йортына алынган бала гына үтәргә тиеш.
Чыганак: window.edu.ru