Казанда яңа уку елында өч яңа мәктәп ачылачак, алар 4 меңгә якын укучыны кабул итә ала. Бу хакта эшлекле дүшәмбедә шәһәр Башкарма комитетының Мәгариф идарәсе җитәкчесе Ирек Ризванов сөйләде, дип яза «Татар-информ».

«Весна-2» торак комплексында урнашкан «Икән» 95 номерлы лицее 1501 укучыны кабул итә ала. Ул табигый-фәнни профильле була. Инженер сыйныфларда 3D-принтерлар һәм дәресләр өчен кирәкле башка җиһазлар куела.

М-14 микрорайонында төзелүче «Гаилә» 133 номерлы лицее 1244 кешегә исәпләнгән. Ул белем бирү процессында заманча технологияләр куллана торган күп профильле мәктәп була. Учреждениедә арт-лаборатория, шулай ук дроннар җыю һәм алар белән идарә итү мәктәбен ачу планлаштырыла. Балалар өчен иртә һөнәри юнәлеш бирү программасы, илнең әйдәп баручы укытучыларыннан авторлык программалары буенча өстәмә дәресләр каралган.

Родин урамындагы 1244 урынлы «Родина» 79 номерлы лицее биология, химия, экология һәм экобиотехнологияләрне тирәнтен өйрәнүче экологик-технологик юнәлешле мәктәп була. Мәктәпне тәмамлаучылар кешеләрнең тормыш сыйфатын яхшыртуга юнәлдерелгән ресурсларны саклау һәм экологик-технологик бурычларны хәл итә алачак.

Казанда барлыгы уку елын 182 меңнән артык укучы башлый, шуларның 19 меңнән артыгы – беренче сыйныф укучылары.