25 нче гыйнварда «Пирамида» мәдәни-күңел ачу комплексында «Татарстан Республикасының ел студенты-2023» премиясе җиңүчеләрен бүләкләү булды. Гран-прига КДЭУ студенты Гүзәл Газетдинова ия булды. Бүләкне аңа ТР Рәисе Рөстәм Миңнеханов тапшырды.

Энергетика университеты студенты Гүзәл Газетдинова «Яз гүзәле» вузара матурлык һәм талант конкурсын җитәкли. Шулай ук ул – «Татар телендә онлайн матурлык марафоны» проектының авторы. Узган ел Гүзәл Газетдинова «Елның студентлар стартабы» грант конкурсында җиңүчеләр рәтенә кергән.

Җиңү ярдәмендә студент кызның дөньяның теләсә кайсы югары уку йортында уку мөмкинлеге барлыкка килгән. СИБУР нефть-газ химиясе компаниясенең ВДНХ полимерлар йортына бару мөмкинлеге тагын бер бүләк булып тора.

Премиягә республиканың 29 югары уку йортыннан барлыгы 538 гариза бирелгән. Бүләкләр 20 номинация буенча тапшырылды. Аларның һәрберсендә лауреатларны һәм җиңүчеләрне Татарстанның күренекле шәхесләре бүләкләде.

«Татарстан Республикасы Ел студенты – 2023» премиясе ТР Хөкүмәте, республика яшьләр эшләре министрлыгы һәм Татарстан Ректорлар советы ярдәме белән «ТР Студентлары лигасы» төбәк яшьләр иҗтимагый оешмасы тарафыннан оештырылган.