КФУ IT-лицееның махсуслаштырылган уку-фәнни үзәгенең 9 нчы сыйныф укучысы Тимур Рысаев #МЫВМЕСТЕ премиясенең төбәк этабында җиңү яулады. Ул «Казан Кремленең аудио-тактиль комплексы» проектын эшләде, әлеге эш начар күрүче һәм сукыр кешеләргә ТР башкаласының истәлекле урыны белән танышырга ярдәм итә. 

Тимур Рысаев сөйләгәнчә, идея аңа сукырлар һәм начар күрүчеләр өчен республика махсус китапханәсендә булганда килгән. Биредә Казанның тарихи урыннарының тактиль макетлары тәкъдим ителгән. Аларга Брайль шрифтында тасвирланган китаплар кушымта итеп бирелгән. Ләкин аны барлык сәламәтлек мөмкинлекләре чикләнгән кешеләр дә белми. Шуңа күрә укучы Сөембикә манарасының моделен Идел буенда таралган җиде телдә аудиосөйләү белән төзергә була.

Бу проект белән лицейчы өч ел дәвамында шөгыльләнә, әлеге вакыт эчендә ул максатчан аудиториядән һәм экспертлардан уңай бәяләр алган. Укучы шулай ук үз эшен ТР Президенты Рөстәм Миңнехановка тәкъдим иткән.

Мәктәп укучысының планнары – грант конкурсларында катнашу һәм күрү буенча сәламәтлек мөмкинлекләре чикләнгән кешеләр өчен үзе төзегән проектны кулланып чаралар үткәрү, дип хәбәр итә КФУның матбугат хезмәте.