Татарстан Республикасы Фәннәр Академиясе актлар залында 18нче декабрьдә “Тартарика” атласлары сериясенең “Этнография” томын тәкъдир итү булачак.

Чарада “Тартарика” атласлары сериясенең баш редакторы Татарстан Республикасы Фәннәр Академиясенең Тарих Институты директоры Р.С. Хәкимов җитәкчелегендәге авторлар коллективы, институт хезмәткәрләре һәм фән җәмәгатьчелеге катнашачак, диелгән Академиянең рәсми сайтында. Шулай ук Атласны тәкъдир итүгә “Дизайн. Мәгълүмат. Картография” нәшер итү-продюссер үзәге генераль директоры А.П.Притворов та чакырылган.

Яңа атласның үзенчәлеге итеп иллюстрация-рәсемнәрнең, карталарның күп булуын атарга мөмкин. “Тартарика” атласлары сериясе татар этногинезын киң планда колачлаган хезмәтләрнең әле дөньяда да беренчесе генә. Шуңа күрә аның кыйммәте аеруча зур.

Мәгълүмат өчен: моңарчы бу сериядән “Атлас Тартарика. История татар и народов Евразии. Республика Татарстан вчера и сегодня”, “Атлас Тартарика. Евразия в старинных картах. Мифы. Пространство. Образы” кебек томнар дөнья күргән иде.

Алдагы хезмәтләрнең беренчесендә Татарстан Республикасы табигый байлыклары һәм табигате, тарихы, мәдәнияты турында, этногрфик һәм икътисади мәгълүмат тупланган. Шулай ук төрле тарихи чорларда Евразия җирлегендә яшәгән төрки халыклар тарихы тасвирланган. Ерак һәм якын көнчыгышта яшәүче милләттәшләребез турында да кызыклы материал урын алган.