15 сентябрь көнне республикабызның 6 авыл мәктәбе ПАЗ маркалы автобуслар алды. Әлеге техника “Мәгариф” милли проекты кысаларында федераль бюджет хисабына алынды, дип хәбәр итә Татарстан Республикасының Мәгариф һәм фән министрлыгы матбугат үзәге.

Тагын 26 ПАЗ республика казнасы хисабына алынган. Алар да сентябрь башыннан авыл җирлегендә яшәүче балаларны база саналган уку йортларына илтә һәм кире алып кайта.

Мәгариф оешмаларын укыту-техник җиһазлар белән тәэмин итү дә дәвам итә. Мисал өчен, федераль бюджет хисабына биология кабинеты өчен 25 комплект, химия дәресләренә 25 комплект, 41 данә интерактив аппарат-программалы комплекс кайтартылган. Бүгенге көндә әлеге аппаратураны гомуми белем бирү оешмаларына тарату процессы бара.