Хөрмәтле дуслар!

Сезнең тәкъдимнәрне исәпкә алып без апрель аеның иң яхшы ресурсы өчен тавыш бирүне яңача оештырырга булган идек. Һәм, әлбәттә, нәтиҗәләр сөендерерлек. Бәйге-акция үзе алдына куйган максатларга ирешә башлады кебек. Аның максатлары һәм бурычлары түбәндәгеләр:

- порталыбыз укучыларының игътибарын порталда урнаштырылып барылган файдалы белем ресурсларына җәлеп итү, интернет кулланучыларын алар белән якыннанрак таныштыру;

- порталда урнаштырыла торган ресурсларның сыйфатын күтәрү өстендә эш алып бару, укытучыларны һәм укучыларны сыйфатлы татарча ресурслар ясарга этәрү;

- яхшы ресурс төзегән авторларны билгеләп үтү, аларны һәм аларның хезмәтләрен башкаларга таныту.

Апрель ае ресурслары белән якыннан бу айда 67 кеше танышып чыкты. 20 ресурс өчен дә тавыш бирү барды. Апрель аенда иң күп тавышны Хәбибуллина Айгөл Фәнзәт кызының "Алмашлык. Алмашлык төркемчәләре" ресурсы җыя алды, әлеге ресурс өчен барлыгы 16 кеше тавыш бирде. Апрель аенда порталыбызда урнаштырылган ресурслар арасыннан кулланучыларга шулай ук Горшунова Илсөя Нурислам кызының "Белем алыйм дисәң ничаклы – сөй, хөрмәт ит, ярат китапны!" һәм Вәлиуллина Лилия Галимҗан кызының "Күренекле дин белгече, галим, мәгърифәтче Р.Фәхреддин мирасын тәрбия сәгатьләрендә куллану" хезмәтләре ошады.

Апрель аеның иң яхшы ресурсы авторы Хәбибуллина Айгөл Фәнзәт кызын чын күңелдән котлыйбыз һәм алдагы хезмәтендә уңышлар теләп калабыз! Сертификат һәм махсус бүләкне алу өчен Татнетны үстерү фонды белән элемтәгә керергә онытмагыз!