“Әкият” курчак театры япон халык әкиятен сәхнәләштерә. 28 март көнне биредә “Ана күзләре” спектакльнең премьерасы булачак. Спектакльне сәхнәгә театрның баш режиссеры, Россиянең һәм Татарстанның атказанган сәнгать эшлеклесе Илдус Зиннуров куя.

Спектакльдә Ана мәхәббәте, тормышның һәр минутында зур түземлек белән ана вазифаларын башкару, бала мәхәббәте, иргә тугрылык темалары күтәрелә. Бу – батырлык һәм ныклыкны яклаучы хикәят.

Сюжет буенча вакыйгаларТау иясе тарафыннан Еланга әверелдерелгән Ана хакында. Ул үзенең башта бер күзен, аннары нәни улы белән ялгыз калган иренә, баланы тәрбияләргә булышу өчен, икенче күзен дә бирә...

«Бу спектакль театрыбызда 1976 елда куелган иде, – ди Илдус Зиннуров. - Һәм ул зур уңыш белән бик озак еллар театр сәхнәсендә барды. Ул вакытта тамашачылар бу әсәрне бик яратып кабул итте. Бу премьерага да без бик төпләп, җитди әзерләнәбез. Ул шулай ук ташамачы күңеленә истә калырдай булсын иде».

Хәзер спектакльдә яңа артистлар катнаша, әлеге әсәргә баш режиссер яңача сулыш өргән. Спектальдә рольләрне Татарстанның халык артисты Рәмзия Фәйзуллина, Татарстанның атказанган артистлары Юрий Чуктиев, Ришат Гыйздәтуллин, Фәнзилә Сабирова, Гөлнур Габдрахманова, театр артислары – Миләүшә Фәйзрахманова, Дилүс Хуҗиәхмәтов, Марс Гайфуллин, Рузилә Зарипова, Албина Шагалиева башкара.

Әсәрнең инсценировкасын да Илдус Зиннуров эшләгән, рәссамы Валентина Губская, пластиканы Гүзәл Маннапова куйган, дип хәбәр итә театрның матбугат хезмәте.

Чыганак: http://www.intertat.ru