Әле күптән түгел генә башкалабыз Казанда Финляндия татар җәмгыяте җитәкчесе, Бөтендөнья татар конгрессы Башкарма комитеты әгъзасы Атик Али булып китте.

Ул Бөтендөнья татар конгрессы Башкарма комитеты рәисе Ренат Закиров белән очрашты. Татар милләте язмышына кагылышлы булган очрашу вакытында сүз Финляндиядә гомер итүче милләттәшләребез хакында барды. Мәгълүм булганча, быел март аенда Финляндиядә Бөтендөнья татар конгрессы Башкарма комитетының бюро утырышы узачак, дип хәбәр итәләр Татар конгрессыннан.

Хәзерге вакытта Финляндиядә 800гә якын милләттәшебез яши. Финляндия татарлары оешмасы Бөтендөнья татар конгрессы белән ныклы хезмәттәшлек итә. Хельсинки каласында эшләүче “Исламия” татар мәдәни-дини үзәгенә якшәмбе мәктәбе, мәдәният үзәге, балалар бакчасы, китапханә, уку кабинетлары һ.б. керә. Татар яшьләре FTB (Finn tatar birligi) дигән үз оешмасын булдырган, аларның төп бурычы – мәдәният проблемаларын хәл итү.

Финляндиядәге татар җәмгыятенең барлык балалары өчен ана телендә башлангыч белем бирү каралган. Җәй айларында татар балалары “Camp” лагеренда ял итә, анда милли гореф-гадәтләр, мәдәният һәм тарих өйрәтелә. Соңгы елларда бу лагерьга Татарстаннан да балалар һәм укытучылар килә башлаган.