Кичә ТР Дәүләт Советында бу уку елында мәктәпләрдә, уку йортларында “Парламент дәресе” проекты кысаларында оештырылган иҗат эшләре бәйгесендә җиңүчеләрне бүләкләү татар халкы тарихына һәм мәдәниятенә мөрәҗәгать итүдән, күңелләргә үтеп керерлек итеп “Әллүки”не сузудан башланып китте. Укучыларны тәбрикләргә дип килгән спикер Фәрит Мөхәммәтшин, ТР Премьер-министры урынбасары - Мәгариф һәм фән министры Энгель Фәттахов, ТР Иҗтимагый палата рәисе Анатолий Фомин һәм башка рәсми затлар үзләре залда кунак булып утырды. Татарстандагы ике дәүләт теле дип игълан ителгән татар һәм рус телләре бүген, чыннан да, дәүләт телләре булуын раслады. ТР Дәүләт Советы Рәисе Фәрит Мөхәммәтшин да, гадәттәгечә, үз чыгышында телләр сәясәтенә тәфсилләп тукталды.

Билгеле булганча, “Парламент дәресе” проекты ТР Дәүләт Советы һәм ТР Мәгариф һәм фән министрлыгы белән берлектә биш ел дәвамында тормышка ашырыла. Әлеге проект өчен ТР Дәүләт Советы Рәисе урынбасары Римма Ратникова җаваплы. Бу дәресләрдә ТР Дәүләт Советы, муниципаль берәмлекләр, еш булмаса да, РФ Дәүләт Думасына Татарстаннан сайланган депутатлар катнаша. Быел спикер Фәрит Мөхәммәтшин үзе дә сентябрь аенда Идел буе физик культура, спорт һәм туризм академиясендә парламент дәресе үткәрде. Узган ел исә Әлмәтнең 7 нче мәктәбе укучылары Татарстан парламентына килде. Үзләренең эшлекле тәкъдимнәрен шул чорда эшләнә торган закон проектларына карата белдерде. Бүген Ф.Мөхәммәтшин билгеләп үткәнчә, әлеге тәкъдимнәрнең күпчелеге исәпкә алынган.

Быел “Парламент дәресе” РФ Конституциясенең 20 еллыгына багышлап үткәрелсә, укучыларның иҗат эшләре темасы итеп Россия Федерациясе һәм Татарстан Республикасы дәүләт символлары алынган. Традиция буенча, әлеге республика иҗат бәйгеләре быелгы 30 меңнән артык укучы һәм укытучы катнашкан “Парламент дәресе” проектына йомгак ясый. Бу уку елында, аерым алганда, 1-4 сыйныф укучылары арасында – рәсем (конкурска 109 рәсем килде), 5-9 сыйныф укучылары арасында “Иң яхшы агитация плакаты” һәм “Иң яхшы агитация-мәгърифәтчел стена газетасы” бәйгеләре (81 эш) үткәрелде. 10-11 нче сыйныфлар Россия Федерациясе һәм Татарстан Республикасы дәүләт символлары турында үз фикерләрен һәм күзаллауларын ирекле темага эссе (83 эш) аша җиткерде. Бүләкләнүчеләр исемлегенә күз салсаң, аларның нәкъ менә Татарстан Республикасы Гимны, РФ гербы, РФ Флагы темаларына мөрәҗәгать итүе күренә. Оештыручылар бүләкләрнең дә саллысын, заманчасын әзерләгән. Бүген алар рәсми затлар кулыннан компьютер техникасына сертификатларны кабул итеп алды. Менделеевскидан 4 сыйныф укучысы Эмил Вәлиев белән Әлмәт балалар йортыннан 9 сыйныф укучысы Резидә Хәсәншина исә, үзенчәлекле идея өчен, спикердан исемле сәгать белән бүләкләнде. Аларның пыяладан һәм пластилиннан, чигеп эшләгән иҗат җимешләре ТР Дәүләт Советы музеенда урын алачак.

Укытучылар да бүләксез калмады: “РФ Конституциясе: 20 ел: темасына дәрес үткәрү өчен методик эшкәртмәләр эшләгән педагоглар ТР Дәүләт Советы Рәисе Рәхмәт хаты белән бүләкләнде. Укытучылар методик эшкәртмәләрдә заманча интерактив технологияләрне мулдан кулланган, РФ Конституциясе халыкара хокукый документлар контекстында каралган. Шулай ук, укучыларның тормыш тәҗрибәсе исәпкә алынып, илнең төп законы практик яктан анализланган. Бүген нәкъ менә укучыларны мәктәптән тормыш көтәргә яраклы итеп әзерләп чыгару бурычы куела да инде. Монда инде законнарны белү зарурлыгы үзеннән-үзе килеп чыга. Укытучылар, кече яшьтәге укучыларны илнең төп һәм җитди документы белән кызыксындырыр өчен, хәтта Россия халыклары әкиятләрен дә эшкә җиккән. Министр Энгель Фәттахов үз чыгышында бу чараның нәкъ менә тәрбияви яктан мөһим булуын билгеләп үтте.

Фәрит Мөхәммәтшин сүзләренә караганда, парламент дәресләре, эшнең бер формасы буларак, көн тәртибенә кереп бара. ТР Дәүләт Советының мондый дәресләр үткәрү идеясе ТР Мәгариф һәм фән министрлыгында хуплау табуы өчен шатланган спикер аның әзерлекле укучыларны һәм актив укытучыларны ачыкларга мөмкинлек бирүен әйтте. Парламент башлыгы шулай ук укучыларның гражданлык җәмгыятенең демократик корылышы белән кызыксынган яшьләрнең булуы, аларның үз фикерләрен белдерүе өчен дә сөенде. Аларны әзерләгән укытучыларга рәхмәт белдерде.

ТР Мәгариф һәм фән министры Энгель Фәттахов алга таба да әлеге проектның министрлык һәм парламент хезмәттәшлегендә тормышка ашырылачагын вәгъдә итсә, вице-спикер Римма Ратникова парламент дәресләренең укучыларга киләчәктә кирәк булачак белемнәр бирүен ассызыклап үтте. “Балаларның эсселарны йөрәкләре аша үткәреп язганлыгы сизелә. Бу проект алга таба да дәвам итәр әле, чөнки ул барыбызга да кирәк”, - дип, ул министрның сүзләрен куәтләп. ТР Иҗтимагый палата рәисе Анатолий Фомин исә “Парламент дәресе” проектын тормыш дәресе, илнең төп законына карата үзеңнең гражданлык позициясен белдерү дип саный.

Чыганак: http://tat.tatar-inform.ru