Казан Кремленең Кол Шәриф мәчетен һәм Благовещение соборын үз эченә алган архитектура комплексы “Россиянең җиде могҗизасы” Бөтенроссия конкурсында җиңү яулады.

2007 елның көзендә башланып бүген төгәлләнгән тавыш бирүнең соңгы нәтиҗәләрен “Татар-информ” агентлыгына “Всемирный следопыт” журналының бүлек башлыгы Александра Пищугина хәбәр итте.

Александра Пищугина барлык татарстанлыларны Казан Кремленең Благовещение соборын һәм Кол Шәриф мәчетен үз эченә алган архитектура комплексының тавыш бирүдә зур аерма хисабына беренче урынны алуы белән тәбрик итте. Безнең архитектура комплексы 46483 тавыш җыйган.

17183 тавыш җыйган Псков-Печерский монастыре – икенче, Санкт-Петербургтагы Сарай мәйданы һәм Кышкы Сарай (17106 тавыш) өченче урынны яулаган.

“Кижи” музей-тыюлыгы (Карелия) дүртенче урынны алган, аның өчен 13723 кеше тавыш биргән, Тубыл Кремле (13236) – бишенче, Выборг замогы (13102) – алтынчы, Түбән Новгород Кремле һәм София соборы (12944) җиденче урынга лаек булган.

Александра Пищугина сүзләренә караганда, “Россиянең җиде могҗизасы”на кергән барлык истәлекле урыннарны “Алтын маршрут”ка берләштерәчәкләр. “Әлегә бу 7 истәлекле урынны Россиянең “Алтын маршруты”на кертү буенча барлык оештыру мәсьәләләре дә хәл ителмәгән, әмма без якын арада вәзыятьнең уңай якка үзгәрәчәгенә өметләнәбез, - дип ассызыклады ул. – Кыенлыкларга карамастан, без Россиядә эчке туризмны үстерүдә мөһим мәсьәләне күтәреп чыгуыбызга һәм әлеге проблемага зур аудиторияне җәлеп итүебезгә бик тә шат”.

“Россиянең җиде могҗизасы” гомумроссия проекты “Всемирный следопыт” журналы тарафыннан Россия Туристлык индустриясе берлеге, “Время отдыхать в России” коммерцияле булмаган парнерлыгы, Travel.ru туристлык порталы һәм «Regnum» мәгълүмат агентлыгы ярдәмендә 2007 елның язында гамәлгә куела. 2007 елның 17 августында Сарай мәйданында “Всемирный следопыт” журналының уникаль экспедициясенә старт бирелә.

Ел дәвамында журналның хәбәрчеләреннән гыйбарәт экспедиция “Россия могҗизасы” исеменә номинантлар һәм “Россия буенча алтын маршрут”ны тәшкил иткән шәһәрләр җиделегенә керергә дәгъва кылучы шәһәрләр буйлап сәяхәт итә. 21 шәһәрдә, шул исәптән “Россиянең җиде могҗизасы” экспедициясе” булып киткән Казанда да эчке туризмны үстерүгә багышланган матбугат конференцияләре үткәрелде.