“Тарих дәшә безгә сәнгать аша” дип аталган электив курс программасы гуманитар профильле класслар өчен эшләнелде. Бу программаның нигезен өч предмет арасындагы бәйләнеш – тарих, әдәбият һәм рәсем сәнгате арасындагы бәйләнеш – тәшкил итә. Әдәбият дәресләрендә, бигрәк тә тарихи темаларны укытканда, рәсем сәнгате әсәрләреннән файдалану әдәби әсәрне яхшырак аңларга, вакыйгалар һәм образларны тирәнрәк ачарга ярдәм итә.

Рус мәктәпләрендә укучы татар балалары өчен төзелгән әдәбият дәреслекләрендә күренекле татар рәссамнарының берничәсе генә бирелгән. Укучылар дәрестә аларның тормышы һәм иҗаты белән таныша, картиналарыннан репродукцияләр карый ала. Милли әдәбиятны, татар рәсем сәнгатен бертигез дәрәҗәдә белергә теләгән укучылар өчен бу гына бик аз. Электив курс программасы шушы җитмәүчелекне беркадәр тулыландыру өчен эшләнде.

Электив курсның эчтәлеге интеграль характерда. Шуңа күрә әлеге курсны тарихчы да, рәсем яки татар әдәбияты укытучысы да укыта ала.

Электив курсның максаты – укучыларда татар рәсем сәнгате турында мәгълүматларын киңәйтү, тулыландыру, өстәмә материал бирү һәм әдәби әсәрләргә нигезләнеп, халкыбыз тарихына карата кызыксыну уяту, милли мирасыбыз белән горурлану хисләре, эстетик зәвык тәрбияләү.