20 апрельдә Бердәм дәүләт имтиханын вакытыннан алдан тапшырырга хокукы булган укучылар өчен имтиханнар башлана. Быел имтиханны вакытыннан алдан тапшыручыларның саны якынча 1,3 мең кеше булачак. Алар Россия Федерациясенең 62 төбәгеннән. Һәр укучы уртача өч фәннән БДИ тапшырырга ниятли.

Иң популяр фәннәр арасында биология (450дән артык кеше тапшыра) һәм җәмгыять белеме (якынча 380 кеше) бар. 2011 елда физика (180 кеше) имтихан тапшыручылар саны буенча тарих фәнен уздырды (150 кеше). Ә менә немец телен — 2, испан һәм француз телләрен 1әр кеше генә тапшырачак. Бердәм дәүләт имтиханын тапшыру, шул исәптән резерв көннәре 27 майдан 20 июньгә кадәр дәвам итәчәк. Быел аны барлыгы 800 мең укучы тапшырыр дип көтелә.

БДИны вакытыннан алдан тапшыру көннәре:

20 апрель (чәршәмбе) — рус теле

22 апрель (җомга) — чит телләр (инглиз, француз, немец, испан), география һәм физика

25 апрель (дүшәмбе) — математика

27 апрель (чәршәмбе) — информатика һәм мәгълүмати-коммуникацион технологияләр, биология, җәмгыять белеме

29 апрель (җомга) — тарих, әдәбият, химия

30 апрель (шимбә) — БДИны тапшыра алмаган яисә имтихан эшен төгәлләргә өлгермәгән укучылар өчен барлык фәннәр буенча резерв көне.

Чыганак: http://www.intertat.ru