«100 талантлы авыл баласы» социаль акциясенең Иҗтимагый советы формалашу тәмамланды. Авыллардагы интеллектуаль талантлы балаларга һәм аларның укытучыларына ярдәм күрсәтә торган әлеге акция традицион рәвештә «АИКБ «Татфондбанк» ААҖ тарафыннан үткәрелә. Акцияне оештыруда Татарстан Республикасының Авыл хуҗалыгы һәм азык-төлек министрлыгы белән Мәгариф һәм фән министрлыклары катнашалар. Быел Иҗтимагый совет рәисе итеп Татарстан Республикасы вице-премьеры, авыл хуҗалыгы һәм азык-төлек министры Марат Әхмәтов билгеләнде.

Конкурс нәтиҗәләре буенча яхшылардан яхшыларны сайлау максатыннан советка республикабызның башка дәүләт һәм җәмәгать эшлеклеләре дә керделәр: Татарстан Республикасының мәгариф һәм фән министры Альберт Гыйльметдинов, фәннәр академиясе президенты Әхмәт Мазгаров, Казан федераль университеты ректоры Илшат Гафуров, Татарстан Дәүләт Советы депутаты, шагыйрь Роберт Миңнуллин һ.б. Иҗтимагый советта акцияне оештыручылар йөзеннән «АИКБ «Татфондбанк» ААҖ идарәсе рәисе Камил Юсупов эш йөртә.

Инде алда хәбәр ителгәнчә, совет составына шулай ук «Умники и умницы» телевизион уенының авторы һәм алып баручысы, МГИМО профессоры Юрий Вяземский да керде.

Беренче тапкыр акция 2009 елда үткәрелде, ул вакытта республиканың барлык районнарыннан 350 дән артык гариза җыелган иде.

Укуда аеруча югары нәтиҗәләр күрсәткән авыл укучыларына ярдәм күрсәтү максатыннан банк 100 укучыга исемле стипендияләр булдырды. Акциядә җиңүчеләр ай саен ел дәвамында банктан үз пластик карталарына бер мең сум күләмендә стипендия алып киләчәк. Быел «100 талантлы авыл баласы» акциясендә авыл балаларыннан кала Татарстанның халкы 35 меңнән артмаган кече шәһәрләре укучылары да катнаша ала. Акциядә катнашу өчен гаризаны 30 сентябрьгә кадәр тапшырырга була. Стипендиатларны тантаналы рәвештә бүләкләү агымдагы елның 30 ноябренә кадәр уздырылачак.

Акция турында тулы мәгълүматны банкның рәсми сайтында (http://tfb.ru/100/) карап барырга мөмкин.