Бу җәйдә Татарстанда 259 мең бала һәм үсмер төрле ял формалары белән тәэмин ителәчәк. Бу хакта бүген Татарстан Республикасы Президенты Рөстәм Миңнеханов балалар һәм үсмерләрнең җәйге ялын оештыруга багышланган киңәшмәдә җиткерде. Киңәшмә РФ Президенты Дмитрий Медведев рәислегендә Мәскәү өлкәсендәге “Левково” балалар -савыктыру комплексы базасында узды. Анда шулай ук РФ вице-премьеры Александр Жуков, төбәкләр үсеше министры Виктор Басаргин, сәламәтлек саклау һәм социаль яклау министры Татьяна Голикова, мәгариф һәм фән министры Андрей Фурсенко, төбәкләр җитәчеләре катнашкан.

“Узган селектор киңәшмәсе барышында республика тәнкыйтькә эләккән иде. Бүген балаларның җәйге ялын оештыру буенча барысының да эшләнгәнен хәбәр итәм”, -дип белдерде Татарстан башлыгы үз чыгышында. Узган җәйдә Татарстанда 245 мең бала һәм үсмер ял итеп, сәламәтлеген ныгыткан булса, быел аларның саны 259 меңгә җитә. Бу максатларга 1 млрд. 49 млн. сум финанслар бүленгән. Моннан тыш, Рөстәм Миңнеханов белдергәнчә, балаларның җәйге ялын оештыруга өстәмә рәвештә 30 млн. сум җәлеп ителәчәк. Узган ел бу максатларга барлыгы 1 млрд. 29 млн. сум тотылган булган.

Татарстан Президенты сүзләренә караганда, балаларның җәйге ялының сыйфаты матди-техник базага бәйле. Татарстанда быел 115 лагерь ачыла, шуларның 36 сы- ел дәвамында эшли торган. Быел республикада ике яңа балалар лагере файдалануга тапшырылган. Рөстәм Миңнеханов балалар лагерьларына эре предприятиеләрнең зур ярдәм күрсәтүенә аерым игътибар юнәлтте. Күп лагерьлар бүген “Татнефть”, “Татэнерго”, “Түбән Кама нефтехим” ААҖ спонсорлык ярдәме белән төзелә һәм яши.

Хәзерге вакытта республикада балаларның җәйге ялын шәхси-дәүләт партнерлыгы нигезендә оештыру программасы әзерләнә. “Без инвесторлар акчаларын җәлеп итү хисабына лагерьлар төзергә уйлыйбыз”, - ди Татарстан башлыгы. Иминлекне тәэмин итү мәсьәләсенә килгәндә, Татарстан балаларны ял итү урыннарына озату һәм алып кайту өчен сак, кайнар азык белән тәэмин ителгән махсус тимер юл составы әзерләгән.

Чыганак: http://president.tatar.ru/tat/