Россия Федерациясе Мәгариф һәм фән министры Андрей Фурсенко дәүләт һәм муниципаль белем бирү учреждениеләрендә эшләүче педагогларны аттестацияләүнең яңа тәртибен раслаган боерыкка кул куйды.

Россия Федерациясе Мәгариф һәм фән министрлыгының Мәгарифтә дәүләт сәясәте департаменты директоры урынбасары Елена Низиенко сүзләренчә, аттестация үтүнең яңа тәртибе гамәлгә керү белән, укытучыларның квалификациясен өзлексез рәвештә һәм инвидуаль үзенчәлекләрен исәпкә алып күтәрү мөмкинлеге барлыкка килә.

Яңа тәртипләр аттестациянең ике төрен күз алдында тота. Мәҗбүри аттестация һәр биш ел саен педагогның үзе биләгән вазыйфасына туры килү-килмәвен ачыклау өчен үткәрелә. Ирекле аттестация укытучының үз теләге белән, аның беренче (яки иң югары) квалификация категориясе таләпләренә туры килү-килмәү дәрәҗәсен билгеләү максатыннан уздырыла.

Россия Федерациясе Мәгариф һәм фән министрлыгы матбугат хезмәте хәбәр иткәнчә, аттестация үтүнең яңа тәртибе берничә ел дәвамында Россия Федерациясе субъектлары, иҗтимагый оешмалар белән берлектә эшләнгән.

Яңа тәртипләр 2011 елның 1 гыйнвареннан гамәлгә керә. Хәзерге вакытта аттестацияне яңача уздыру буенча методик күрсәтмәләр әзерләнә, аларны төбәкләргә агымдагы елның сентябрендә юллау көтелә.

Чыганак: http://tat.tatar-inform.ru