Татар мәгарифе порталы
1 нче апрель көнне, ягъни иртәгә Татар дәүләт гуманитар-педагогика университетының актлар залында Татарстан Республикасы яшь педагогларының II Форумы узачак.
Форумны Татарстан Республикасының Мәгариф һәм фән министрлыгы Татарстан Республикасының яшь педагоглары берләшмәсе белән берлектә оештыра.
Форум – мәгариф өлкәсендә эшләүче яшьләрнең инициативасын яклау һәм һөнәри үсешләренә ярдәм итү максатларыннан чыгып уздырыла, дип хәбәр итә Татарстан Республикасы Мәгариф һәм фән министрлыгының матбугат хезмәте.
Әлеге чарада Татарстан Республикасының яшь педагоглары, Татар дәүләт гуманитар-педагогика университеты укытучылары, студентлар һ.б. катнаша.
Форумда Татарстан Республикасының Мәгариф һәм фән министры Н.Вәлиев, ТДГПУ ректоры Р.Замалетдинов, Яр Чаллы, Зәй, Мөслим якларыннан яшь педагоглар берләшмәләренең муниципаль җитәкчеләре катнашуы планлаштырылган. Пленар утырышта Татарстан Республикасы яшь педагоглары берләшмәсенең актив педагогларын бүләкләү оештырылачак һәм “Педагогик олимп” республика конкурсындагы җиңү яулаучыларны әзерләүче укытучыларга, шулай ук “Педагогик олимп 2008” конкурсы җиңүчеләренә Татарстан Республикасы Мәгариф һәм фән министрлыгыннан Рәхмәт хатлары тапшырылачак.
Залга “ирекле микрофон” урнаштырылачак һәм теләге булган һәркем Татарстан Республикасы мәгариф һәм фән министрына сорауларын бирә алачак.
Форум кысаларында конференцияләр, мастер-класслар, дискуссион клуб утырышлары уздырылачак. Моннан тыш, “Педагогик академия” исемле уен, лекция һәм тәрбия эшләренә юнәлдерелгән төркемнәр белән проектлар төзү һәм аларны яклау каралган.
•
«Татар-информ»