Соңгы 5 ел эчендә мәктәп укучыларының төрле авырулар белән интегү проценты арткан. Бигрәк тә өлкән сыйныф укучылары төрледән-төрле чирләргә дучар. Белгечләр фикеренчә, төп сәбәпче - мәктәп.

Мәктәп укучыларының сәламәтлеген ничек саклап калу һәи ныгыту турында сүз Россия Мәгариф һәм фән министрлыгы коллегиясендә барды. Белгечләр фикеренчә, моңа мәктәп тормышына күнегү белән бәйле психологик стреслар, укыту планының зурлыгы, физик күнегүләрнең җитмәве, ә иң мөһиме педагогларның компетент булмавы сәбәпче. Бу - Россия Мәгариф һәм фән министры Андрей Фурсенко фикере. Аның каравы, хәзер мәктәп укучыларының сәламәтлеген комплекслы саклаячаклар. Төп басым сәламәт яшәү рәвешен пропагандалау һәм яшьләр арасында спортны популярлаштыруга, мәктәптә туклануны яхшырту һәм уку йорты медицинасын кайтару, психологлар эшен активлаштыруга ясалачак.

Үзгәрешләр мәктәп программасына да кагылырга мөмкин. Сүз югары математиканы укытмау турында бара. Бу тәкъдим белән Мәскәү дәүләт университеты ректоры Виктор Садовничий да килешкән. "Гади мәктәптә интегралларның кирәге юк. Бу өстәмә нагрузка гына. Аңа карап укучылар күбрәк белә башламый, киресенчә, кирәген дә үзләштерә алмый”, - дип үз фикерен белдергән ул. "Мәктәп укучыларын геометрия (планеметрия һәм стереометрия), алгебра һәм тригонометрия" кала башка темалардан арындырырга да була, дигән ул.

Кимегән сәгатьләрне физкультура дәресләре тулыландырачак. Өстәвенә, дәресләр принципиаль рәвештә башкача алып барылачак. Һәр укучы белән индивидуаль эшләү юлын табачаклар. Барлык спорт залларга да яңа җиһазлар кайтару да планлаштырылган. Ләкин шунысы да бар, бүгенге көндә бары 80 процент мәктәпнең генә шәхси спорт залы бар. Үз бассейны булган уку йортлары тагы да азрак - 2 процент.

Зур проблемаларның берсе - дересләрне алып барганда укытучылар тарафыннан балаларның психофизиологик үзенчәлекләре исәпкә алынмавы. “Мәктәптәге йөкләнеш сәгатьләр саныннан бигрәк, дәресләрнең ничек үтүенә бәйле”, - дип саный Балалар һәм үсмерләрнең яшь физиологиясе Институты директоры Марианна Безруких. Бездә исә педагогия уку йортларында елдан-ел балалар психологиясе һәм физиологиясе курслары киметелә.

Чыганак: mon.gov.ru