Республикабызның мәктәп укучылары өчен көзге каникуллар 29 октябрьдә башланачак һәм 2026 елның 8 ноябренә кадәр (бәйрәм көннәрен исәпкә алып 11 календарь көнгә кадәр) дәвам итәчәк.

2026/2027 уку елына каникул срокларын Татарстан Республикасы Мәгариф һәм фән Министрлыгы тәкъдим итте. Бердәм график укучыларның оешкан ялы өчен шартлар тудыру, аларның тормышы һәм сәламәтлеге иминлеген тәэмин итү, шулай ук каникул вакытында чараларның бердәм планын гамәлгә ашыру максатларында эшләнгән.

Тәкъдимнәр нигезендә:

• кышкы каникуллар – 2026 елның 31 декабреннән 2027 елның 10 гыйнварына кадәр (11 календарь көн);
• беренче сыйныф укучылары өчен өстәмә каникуллар – 2027 елның 13 февраленнән 21 февраленә кадәр (9 календарь көн);
• язгы каникуллар – 2027 елның 27 мартыннан 4 апреленә кадәр (9 календарь көн).

Җәйге каникулларның башлануы һәр белем бирү оешмасының календарь уку графигы белән билгеләнә, аларның гомуми дәвамлылыгы кимендә 8 атна тәшкил итәргә тиеш. Уку елы 26 майда тәмамлана. 9 һәм 11 сыйныф укучылары өчен уку елының тәмамлануы ел саен дәүләт йомгаклау аттестациясе расписаниесе нигезендә билгеләнә, ул Россия Федерациясе Мәгариф министрлыгы һәм Мәгариф һәм фән өлкәсендә күзәтчелек буенча федераль хезмәт тарафыннан раслана. Календарь уку графигы проекты 2026 һәм 2027 елларга җитештерү календарен исәпкә ала.

Көзге каникул чорында республикада балаларның мәктәп яны лагерьларында ялы оештырылачак: 324 лагерь планлаштырылган, аларда 13 307 укучы ял итәчәк.