Татар теле һәм әдәбияты буенча яңа буын дәреслекләр эшләү дәвам итә. «Агымдагы елда 30 дәреслек әзерләнеп, федераль экспертизага җибәрелде», – диде Татарстан мәгариф һәм фән министры Илсур Һадиуллин ТР Дәүләт Советының 25нче утырышында мәгариф үсеше турында докладында.

«Телләрне үстерү һәм республикада яшәүче халыкларның милли тел мәнфәгатьләре балансын саклау максатларында Татарстан дәүләт телләрен һәм башка телләрне саклау, өйрәнү һәм үстерү буенча дәүләт программасы гамәлгә ашырыла. 2025-2026 уку елында биш телдә белем бирү оештырылган иде, «туган тел һәм әдәбият» предметы өлкәсендә җиде тел укытылды. «Адымнар» полилингваль комплексы уңышлы эшләп килә», – диде министр.

Ул узган уку елында 5-7 сыйныфларда аерым модуль буларак төбәк тарихы укытыла башлаганын искәртте. «Тарих институты һәм КФУ галимнәре белән берлектә әзерләнгән укыту-методик комплектлары уңай бәя алып, дәреслекләрнең федераль исемлегенә кертелде», – диде Илсур Һадиуллин.

Министр Россиянең татарлар күпләп тупланып яши торган төбәкләре белән республиканың муниципаль берәмлекләре арасында тыгыз хезмәттәшлек урнашканын билгеләп узды. «Россия төбәкләрендә һәм якын чит илләрдә урнашкан Каюм Насыйри институтының татар мәгариф үзәкләренә даими методик ярдәм күрсәтелә. 2025 елда Чувашия, Мордовия һәм Алтай республикаларында «Татар мәгарифе көннәре» оештырылды. Әлеге чара тәҗрибә уртаклашу өчен зур әһәмияткә ия», – диде Һадиуллин.