Казан (Идел буе) федераль университеты 12 гыйнвардан 31 мартка кадәр мәктәп укучылары өчен «Лобачевский. Алгарыш» исемле фәнни тикшеренүләр конкурсын оештыра. Анда 4–11 сыйныф укучылары катнаша ала. Проект Тамбов өлкәсе «Электроприбор» заводы ярдәме белән гамәлгә ашырыла.

Әлеге конкурс Н.И.Лобачевский исемендәге Бөтенроссия фәнни конференциясенең (халыкара) дәвамы булып тора. Аның төп максаты — укучыларда фәнгә карата кызыксыну уяту.

Катнашучылар фәнни эшләрен тәкъдим итәчәк, аналитик һәм иҗади фикерләү сәләтләрен камилләштерәчәк, шулай ук заманча фәнни эш ысуллары белән танышачак.

Конкурс берничә этапта үткәреләчәк. Сайлап алу этабы 12 гыйнвардан 9 февральгә кадәр була. Йомгаклау этабы 27–29 мартка планлаштырылган: финалга чыккан укучылар проектларын КФУ мәйданчыгында яклаячак.

Конкурста җиңүчеләргә 2026/27 уку елында КФУга укырга кергәндә өстәмә 10 балл, ә призерларга — 8 балл исәпләнәчәк.

Конкурс кысаларында укытучылар өчен түгәрәк өстәл дә оештырылачак. Ул 28 мартта үткәреләчәк һәм сәләтле укучыларны ачыклау, аларга ярдәм итү һәм үстерү мәсьәләләренә, шулай ук әлеге өлкәдәге заманча инновацион практикаларга һәм технологияләргә багышланачак. Катнашучылар һөнәри тәҗрибә уртаклаша һәм талантлы балалар белән эшләүнең актуаль алымнары турында фикер алышачак.