Быел чыгарылыш сыйныф укучылары төрле биш  университетка унга кадәр гариза бирә алачак. Бу хакта РФ фән һәм югары белем министры Валерий Фальков Россия Президенты Владимир Путинның Хөкүмәт әгъзалары белән уздырган киңәшмәсендә хәбәр итте.

«Без абитуриентларның әзерлек юнәлешләрен сайлау мөмкинлекләрен киңәйттек. Әгәр алдагы елларда абитуриентлар өч белгечлек һәм юнәлеш буенча бишкә кадәр югары уку йортына керү өчен гариза бирергә хокуклы булса, быелдан укырга керүчеләр төрле  биш университетка унга кадәр гариза бирә алачак», — дип сөйләде министр.

Фальков абитуриентларның югары уку йортларына керү өчен документларны турыдан-туры да һәм дистанцион рәвештә дә бирә алачагын билгеләп үтте. «Быел без традицион срокларга кайтабыз. Инде 20 июньнән документлар тапшырырга була, һәм аларны кабул итү 29 июльгә кадәр дәвам итәчәк", - дип ачыклык кертте ул.

Фән һәм югары белем министрлыгы башлыгы өстәмә кабул итү сынаулары, шул исәптән иҗади юнәлештә, шулай ук югары уку йортлары тарафыннан 29 июльгә кадәр үткәрелә, дип өстәде. 17 августта көндезге уку рәвешендәге студентларны беренче курска кабул итү турында боерыклар басылып чыгарга тиеш. "Димәк, 1 сентябрьдә штат режимында без илнең барлык югары уку йортларында уку елын башларга планлаштырабыз", - дип белдерде министр.

Аның сүзләренә караганда, быелдан башлап югары уку йортлары берничә охшаш юнәлешкә гомуми конкурс үткәрә алачак. "Абитуриентларны укырга гомуми исемлек буенча кабул итәчәкләр, ә инде бераз соңрак алар конкрет юнәлешләргә һәм профильләргә бүленәчәк", - дип билгеләде докладчы.

Фальков аңлатканча, элек һәр белгечлеккә яки вузда юнәлешкә аерым конкурс булган. Мәсәлән, «информатика һәм исәпләү техникасы» төркеменең берсе кысаларында «информатика һәм исәпләү техникасы», «мәгълүмат системалары һәм технологияләре», «гамәли информатика» һәм «программа инженериясе» юнәлешләре буенча конкурслар аерым үткәрелде. Быел югары уку йортларында бюджет урыннары саны 34 747гә артты, шуларның 85%ы Россия төбәкләренә җибәрелде. Федераль бюджет хисабына укырга урыннарның гомуми саны быел 576 498 тәшкил итәчәк.