Күренекле милләттәшебез – драматург һәм җәмәгать эшлеклесе Туфан Миңнуллинның киңкырлы эшчәнлегенә багышлап, аның иҗади мирасын киңрәк өйрәнү һәм популярлаштыру максатыннан, укытучылар һәм укучыларның I республика конференциясе уздырыла.

Конференциядә катнашучылар 5 номинациядә көч сынаша:

“Сөй гомерне, сөй халыкны…” (шигърият);

“Кызыл тышлы дәфтәрдән” (журналистика);

“Театр яктылыкка, нурга илтә!..” (драматургия);

“Үзем сайлаган язмыш” (фәнни эшләр);

“Утырып уйлар уйладым” ((укытучылар өчен “түгәрәк өстәл”).

Конференция 2 этаптан тора. Аның “Драматургия. Театр яктылыкка, нурга илтә!..” номинациясе буенча сайлап алу туры 21 февраль – Халыкара туган тел көнендә Казанның Фатиха Аитова исемендәге татар телендә белем бирүче 12 нче гимназиясен үткәрелгән.

Биредә республиканың Биектау, Арча, Яшел Үзән, Лаеш, Питрәч, Аксубай, Алексеевск, Кама Тамагы, Сарман районнарыннан һәм Чаллы, Казан шәһәрләреннән 30га якын иҗат коллективлары күренекле драматургның әсәрләрен сәхнәләштерде. Катнашучылар чыгышын Туфан аганың тормыш иптәше Нәҗибә ханым Ихсанова, кызы Әлфия Миңнуллина, Г.Камал исемендәге татар дәүләт академия театры артистлары Илдус Әхмәтҗанов, Әсхәт Хисмәтов, Ирек Баһманов бәяләде.

Театр бәйрәменнән беркем дә бүләксез китмәде. Һәр коллективка ТР Мәгариф һәм фән министрлыгы шаһәдәтнамәсе һәм Г.Камал исемендәге Татар дәүләт академия театры бүләкләре – спектальгә билетлар һәм истәлекле китаплар тапшырылды. Җиңүчеләр исә Халыкара театр көнендә – 2014 елның 27 мартында конференциянең йомгаклау тантанасында игълан ителәчәк, дип хәбәр итә Бөтендөнья татар конгрессы сайты.

Туфан Миңнуллин истәлегенә багышланган укытучыларның һәм укучыларның I республика конференциясе Татарстан Республикасы Дәүләт Советының мәдәният, фән, мәгариф һәм милли мәсьәләләр буенча комитеты, Татарстан Республикасы Мәгариф һәм фән министрлыгы, Казан шәһәре Башкарма комитетының мәгариф идарәсе, Г.Камал исемендәге татар дәүләт академия театры һәм Фатиха Аитова исемендәге татар телендә белем бирүче 12 нче гимназия ярдәме белән гамәлгә куелган.

Искәртеп үтик: фәнни-гамәли һәм иҗади эшләре белән шушы чарада катнашырга теләгәннәрдән гаризалар 7 мартка кадәр кабул ителә, йомгак исә 15 мартта ясала. Моның өчен “Туфан Миңнуллин истәлегенә багышланган I республика конференциясенә” дип язып, Казанның Фатиха Аитова исемендәге татар телендә белем бирүче 12 нче гимназиясенә kzlar_ile@mail.ru электрон адресы һәм 420034, ТР, Казан, Декабристлар ур., 89А почта адресы буенча заявка җибәрү кирәк.

Чыганак: http://tat.tatar-inform.ru