Татар мәгарифе порталы
Сез монда
Уфада Башкортстан Татар иҗтимагый үзәгенең чираттагы киңәйтелгән утырышы булып үтте.
Аның көн тәртибендә нигездә республика татар мәктәпләре тирәсендәге борчулы хәлләрне тикшерү торды. Бу мәсьәлә буенча сөйләшү өчен Уфадагы татар теле һәм әдәбияты укытучылары да чакырылган иде.
Соңгы елларда Башкортстанда күп кенә татар мәктәпләре бетерелде йә булмаса аларда татар телендә укыту башкортчага үзгәртелде. Шул ук вакытта күп кенә мәктәпләрдә татар сыйныфлары да бетерелде. Хәзер башкорт телен укытуга өстенлек бирелә һәм башкорт теле укытучылары байтак ташламалардан файдалана, күбрәк хезмәт хакы ала.
Утырышта Уфадагы “Әлифба” исемле татар прогимназиясенә бәйле хәлләр дә тикшерелде. Әлеге прогимназиянең 1нче сыйныфына быел укучылар кабул ителмәгән. Хәзер андагы 2-4нче сыйныфлардагы татар балалары укып беткәч, татар прогимназиясе ябылачак. Бу хакта республика Мәгариф министрлыгының күрсәтмәсе бар.
Әлеге прогимназияне саклап калу өчен, анда укучы балаларның ата-аналар комитеты һәм Башкортстан татар конгрессы берлектә күп кенә чаралар оештырып карады. Әмма фәтвасы гына булмады.
Элегрәк тә хәбәр ителүенчә, Уфадагы “Әлифба” татар прогимназиясе басымга дучар ителде. “Әлифба” Уфа үзәгендәге бердәнбер татар мәктәбе. Прогимназиядә моңарчы 50дән артык татар кызлары һәм малайлары дүртенче сыйныфка кадәр белем ала иде. Элекке елларда беренче сыйныфка икешәр төркем, ягъни икешәр класс бала җыялар иде биредә. Билгеле инде укытучыларның кәефе шәптән түгел. Укытучылар шуңа аптырый – ни өчен нәкъ менә бердәнбер татар прогимназиясен ябу өчен күрсәтмә бирелгән соң?
Бүгенге көндә Башкортстанда илледән артык башкорт гимназиясе исәпләнә. Шул ук вакытта татар гимназияләре өчәү генә - икесе Уфада һәм тагын Бәләбәй шәһәрендә берәү.
Башкортстан Татар иҗтимагый үзәге киңәшмәсендә катнашучылар, татар укытучылары белән бергә, татар мәгарифе турында концепция әзерләргә һәм аны Башкортстан җитәкчелегенә дә җиткерергә, киң җәмгатьчелек игътибарына да чыгарырга килеште.
Чыганак: www.tatar-inform.ru