Яшел Үзәндә Бердәм дәүләт имтиханында 100 балл җыйган чыгарылыш сыйныф укучылары 100әр мең сум алачак. Бу яңа ярдәм чарасы турында шәһәр мэры Михаил Афанасьев белдерде.

Аның сүзләренчә, программа «Сто баллов – сто тысяч» дип атала. «Бу абитуриентлар өчен, бигрәк тә югары уку йортында укый башлаганда яхшы бүләк булачак дип саныйм», – дип ассызыклады ул.

Элек Яшел Үзән районында йөз балл җыйган чыгарылыш сыйныф укучыларына 30ар мең сум тапшыралар иде. Быелдан түләү күләме өч тапкырдан күбрәккә артты.