30 марттан 1 апрельгә кадәр Казанда «Методик эшне үстерүдә алгарыш проектлары технологияләре» темасына II Республика методистлар форумы үткәреләчәк. Чара академик М.И. Мәхмүтовның 100 еллык юбилеена багышланган һәм 184 нче гимназия базасында оештырылачак.

Форумда Татарстанның 500дән артык методисты катнашачак. Алар методик хезмәтне үстерү өстенлекләре, математик һәм табигый-фәнни белем бирүнең сыйфатын күтәрү мәсьәләләре, шулай ук педагоглар белән эшләүнең инновацион формаларын кертү, шул исәптән ясалма интеллект технологияләрен куллану турында фикер алышачаклар.