Быел «Гәүһәр» проектында 1200 бала катнашкан. Программа 46 мәктәп укучысын һәм 20 балалар бакчасында тәрбияләнүчеләрне берләштергән, алар өчен дүрт ай дәвамында татар телендә төрле юнәлештәге дәресләр үткәрелгән. Бу хакта эшлекле дүшәмбедә Казан башлыгы урынбасары Гүзәл Сәгыйтова хәбәр итте.

Проект кысаларында яшь буын өчен бию, җыр, сәхнә теле һәм халык уен коралларында уйнау дәресләре үткәрелә. Балаларны танылган укытучылар, театр һәм филармония артистлары өйрәтә. Дәресләрнең үзенчәлеге шунда ки, алар тулысынча татар телендә алып барыла. Алган күнекмәләрен балалар зур сәхнәдә йомгаклау фестивалендә күрсәтәләр.

«Гәүһәр» проекты Казан мэриясе тарафыннан Татарстан Республикасы рәисе каршындагы татар телен һәм Татарстанда яшәүче халыкларның туган телләрен саклау, үстерү мәсьәләләре комиссиясе ярдәмендә булдырылган. Татар мәдәниятен һәм татар телен популярлаштыру, туган телгә кызыксыну уяту һәм үсеп килүче яшь буынны сәнгатькә җәлеп итү проектның төп максаты булып тора.