Казан мэры Илсур Метшин Татарстан башкаласында балалар иҗат һәм белем бирү төркемнәре өчен конкурс булдыру тәкъдиме белән чыкты. Шәһәр башлыгы әлеге фикер белән август педагогика конференциясендә чыгыш ясады.

Илсур Метшин Мәгариф идарәсе җитәкчесе Ирек Ризвановка мәгариф учреждениеләрендә тәрбияләнүчеләр арасында талантларны ачыклауга һәм аларга ярдәм итүгә юнәлдерелгән яңа шәһәр конкурсы концепциясен эшләргә кушты.

«Безгә үз проектыбыз кирәк, ул иң яхшыларны бәяләргә һәм күренекле мәктәпләрне һәм балалар бакчаларын финанс яктан бүләкләргә мөмкинлек бирәчәк», — дип ассызыклады мэр.

Ел саен үткәрелә торган «Зур тәнәфес» фестивалендә быел Вахитов районының 116 нчы номерлы һәм Идел Буе районының 186 нчы номерлы лицей укучылары җиңүче булдылар. «Пирамида» мәдәни-күңел ачу комплексында узган гала-концертта балаларга бер миллион сумлык сертификатларны Казан Башкарма комитеты җитәкчесе урынбасары Гүзәл Сәгыйтова тапшырды.