15 майда «Әкият» курчак театрында «Сәйяр» балалар һәм яшүсмерләр театрлары Республика фестиваленең йомгаклау тантанасы узды. Әлеге чара «Татарстан Республикасы дәүләт телләрен һәм Татарстан Республикасында башка телләрне саклау, өйрәнү һәм үстерү» дәүләт программасы кысаларында оештырылды, дәүләт заказы кысаларында «Белем.ру» компаниясе дә әлеге чараны югары дәрәҗәдә оештыруда тырышлык куйды. 

Билгеле ки, «Сәйяр» – беренче татар профессиональ театр труппасы исеме, фестивальнең атамасы уңышлы сайланган, балаларыбызның сәнгатьтә тәүге омтылышларын үстерү белән бәйле. Киләчәк буын вәкилләрендә рухи үсешкә этәргеч бирүче иҗатка мәхәббәт уятуда, татар халкының милли мәдәниятенә карата ихтирам хисе тәрбияләүдә, язучы һәм драматургларыбызның әсәрләренә карата кызыксыну тудыруда әһәмияте зур, әлбәттә. Фестивальдә катнашучы һәр коллектив тырышып әзерләнгән, алардан бәйрәм рухы бөркелеп торды. Сәләтле балалар Казан, Әлмәт, Яр Чаллы шәһәрләреннән, Актаныш, Сарман, Минзәлә, Саба, Әтнә, Арча, Кукмара, Норлат, Бөгелмә, Мамадыш, Балык бистәсе, Яшел Үзән районнарыннан бер сәхнәдә җыелды. 

Җиңүчеләрне, финалистларны һәм фестивальдә катнашкан һәр укытучы һәм укучыларны чын күңелдән котлыйбыз һәм киләчәктә яңадан-яңа җиңүләр телибез!