2008 елның 17нче декабрендә Казанда “Россия Федерациясе мәгарифе киңлегендә татар теле һәм әдәбияты” исемле Бөтенроссия фәнни–гамәли конференция узачак. Чараны оештыручылар арасында Россия Федерациясенең Мәгариф һәм фән министрлыгы, Татарстан Республикасының Мәгариф һәм фән министрлыгы, Татарстан Республикасы Фәннәр Академиясе, Мәгарифне үстерү федераль институты, Казан дәүләт университеты, Татар дәүләт гуманитар–педагогика университеты бар.

Конференциядә татар теле һәм әдәбиятын өйрәтүнең актуаль проблемалары күтәреләчәк. Очрашуда Татарстанның һәм Россиянең билгеле галимнәре, методистлары, шулай ук Татарстан Республикасының һәм Россия Федерациясенең мәгариф һәм фәнни–тикшеренү оешмалары җитәкчеләре катнашуы да көтелә.

Җыенда түбәндәге темалар буенча фикер алышу алып барылачак:
– гомуми белем бирү оешмаларында татар теле һәм әдәбиятын укыту проблемалары һәм перспективалары;
– югары уку йортларында татар теле һәм әдәбиятын өйрәнү;
– гомуми белем бирү Федераль дәүләт мәгариф стандартында татар теле һәм әдәбияты;
– заман таләпләрен исәпкә алып, татар теле һәм әдәбиятыннан яңа мәктәп программаларын һәм дәреслекләр булдыру;
– тел һәм әдәби белем бирүнең теоретик һәм методик нигезләре;
– мәктәпләрдә полилингваль филологик белем бирүне оештырып җибәрү.
Конференциядә фикер алышу ике телдә ( татар һәм рус) алып барылачак.

Бирегә тәкъдим ителгән материалларны җыентык итеп әзерләү планлаштырыла. Чарада катнашу өчен гаризаларны һәм доклад текстын агымдагы елның 1 ноябренә кадәр җибәрергә кирәк. Адрес: Казан шәһәре, Кремль, 5нче подъезд, Татарстан Республикасы Фәннәр Академиясенең Тарих институтындагы Тарих һәм милли мәгариф теориясе үзәгенә, Марат Мингали улы Гыйбатдиновка юлларга кирәк. Телефон–факс: 8(432)2921761, e-mail: history@tataroved.ru.

Доклад текстлары ике данәдә электрон адреска җибәрелергә тиеш. Күләме 5 биттән дә артмавы сорала (редактор Word, формат А4, кегель 12, берәрле интервал).

Конференциядә катнашу өчен гариза язганда түбәндәгеләрне күрсәтергә онытмагыз: исем, фамилия, әтиегезнең исеме, фәнни дәрәҗә, фәнни исем, эш урыны, андагы вазыйфагыз, почта адресы, телефон, e-mail һәм докладның исеме.