Татар мәгарифе порталы
Сез монда
“Россия ел укытучысы-2008” россиякүләм бәйгесенең абсолют җиңүчесе инде билгеле. Михаил Стародубцев Мәскәү шәһәре №1060 урта мәктәбендә музыка дәресләрен укыта. Җиңүченең исемен Укытучылар көненә багышланган тантаналы чарада Россия Федерациясенең Мәгариф һәм фән министры Андрей Фурсенко белән бәйгенең Зур жюри рәисе, Мәскәү дәүләт университеты ректоры Виктор Садовничий атады.
Җиңүче 28 ел балалар белән эшли икән. Шулай ук Михаил тугызларның сыйныф җитәкчесе дә. Күптән түгел генә булып узган туган көненә (49 яшь) Россиянең иң яхшы укытучысы үзенә зур бүләк әзерләгән булып чыга. Баксаң, Михаил Стародубцев мондый конкурста беренче генә тапкыр катнаша икән.
"Ышанычыгызга, бәйгедә кичергән бәхетле мизгелләр өчен зур рәхмәт. Мондый исемгә лаек булу зур дәрәҗә, шуңа коллегалар, бигрәк тә укучылар алдындагы җаваплылык та зур”, - дип уртаклаша Михаил Стародубцев.
Бәйгенең тарихын искә төшерсәк, “Ел укытучысы” тәүге тапкыр 1990 елда ук уздырыла. Чараны Россия Федерациясенең Мәгариф һәм фән министрлыгы, Россия Федерациясенең халык мәгариф һәм фән хезмәткәрләре профсоюзы һәм "Учительская газета" оештыра. Быел бәйге Санкт-Петербург шәһәре хакимияте ярдәме белән узган.
Гадәт буенча чираттагы финал алдагы елның абсолют җиңүчесе шәһәрендә үтә. Былтыр берьюлы ике математика укытучысы - Анна Мехед (Мәскәү) һәм Дмитрий Гущин (Санкт-Петербург) беренче урынга лаек булган иде. Шуңа да финал өчен бу ике шәһәрнең берсе - Санкт-Петербург сайланган. Димәк, киләсе ел финалы Михаил Стародубцев яшәгән калада узачак.