Татар мәгарифе порталы
Сез монда
Хөрмәтле кулланучылар!
Моннан 2 атна элек Татнетны үстерү фонды Белем.ру порталы кысаларында республикабызның 8-11 нче сыйныф укучылары, махсус урта һәм югары уку йортларын тәмамлаучы яшьләр арасында шагыйрьләр бәйгесен үткәрә дип игълан иткән идек.
Ике атна узды һәм нәтиҗәләрне дә игълан итәр вакыт җитте. Чыгарылыш сыйныф укучыларының вакыты тар булдымы, татар шигърияте белән кызыксынучы яшьләр аз булып чыктымы - бәйгегә бары тик ике генә конкурсанттан шигырь кабул итеп алдык. Шунысы куанычлы - жюрига эш аз булды. :)
Иң беренче булып без шигырьне Шәйхелова Сәрбиназдан кабул итеп алдык. Һәм нәкъ менә ул бәйгебезнең җиңүчесе дә булды. Шигырь шактый оста язылган, Сәрбиназның тел байлыгы да шактый югары дәрәҗәдә икәне күренә. Безнең бәйгегә кадәр дә аның иҗат өлкәсендә төрле уңышларга ирешкәне бар икән. Аңа без ВКонтактеда 100 тавыш бүләк итәбез (700 сумга тәңгәл), ә шигырен "Идел" журналына бастыру өчен тәкъдим итәчәкбез. Шушы көннәрдә Сәрбиназга тапшыру өчен диплом да әзерләп куячакбыз. Аны безнең офиска килеп алу мөмкин булачак.
Икенче катнашучыбыз Рәзинә Сәхипгәрәеваның шигыре әле камиллек сорый, әмма инде бу иҗади җимешендә дә аның шигърияткә таланты бар дип әйтә алабыз. Аңа күбрәк татар шигърияте белән танышырга тәкъдим итәбез һәм киләсе бәйгеләребездә көтеп калабыз. Аңа да бонус буларак ВКда тавышлар бүләк итәбез.
Бәйгедә катнашкан ике кызыбызны да бүгенге "Соңгы кыңгырау" бәйрәме белән котлыйбыз, тормышта үз юлларын табуларын һәм иҗади уңышлар теләп калабыз!
Сәрбиназның шигырен сезнең игътибарга тәкъдим итәбез:
И мәктәбем, синдә кайный тормыш:
Чыгарылыш арты чыгарылыш.
Күз яшьләре. Котлау. Яңа буын.
Узган урын алмашына – яңа урын.
Яшел такта. Число. Һәм каләмнәр
Ашыга-ашыга дәфтәр буйлап йөгерәләр.
Ак алъяпкыч.
Тагылмаган галстук.
Тагыла ул директорны күрүгә үк.
Эзтабарга алу, пионерга...
Тора-бара килеп җитә ГИАлар да.
Аннан инде бераз “Ух, котылдык,
Ял итәргә без дә менә унга калдык”.
Ә 10 ул тиз үтә – сентябрь – май,
Практикада уза тагы бер ай.
Кемдер китә, кемдер кала
Алмый калган белемнәрен ала-ала.
Менә тагы җиткән чыгарылыш.
Күз яшьләре. Шатлык. Яңа балкыш.
Очып китә оясыннан зур дөньяга
Канатларын җәеп тик сигез кош...
И мәктәбем, синдә кайный тормыш..