13 март көнне Сәнгать галереясендә рәссам Илгизәр Самакаевның шәхси күргәзмәсе ачыла. Мәгълүм булганча, кылкаләм остасы быел Г.Тукай исемендәге премиягә дәгъват кылучылар исемлегендә.

Илгизәр Самакаев Мәскәүдәге В.И.Суриков исемендәге институтны тәмамлаганнан соң Казанда иҗат итүче талантларыбыздан санала. Аның иҗат юлы 1980 елларга барып тоташа. Ул иҗат итүче иң төп жанр - портрет. Татарда «сандугач» исеменә казанган, танылган җырчы һәм композитор Сара Садыйкованың портретын күреп кемнәр генә сокланмагандыр. Моң белән сугарылган бу картина Сара Садыйкованың бар мөләемлеген, күңел байлыгын бирә алган.

Илгизәр аганың портрет жанрындагы әсәрләре арасында русларның күренекле артисты Юрий Никулин сүрәтләнгән әсәр дә аерым игътибарга лаек. Автор әлеге шәхес белән шәхсән үзе дә таныш булган. Самакаев пумаласы Бөек Ватан сугышы, хезмәт каһарманнарына да битараф булмаган. Һәрбер әсәрендә шәхеснең дөньяга карашын нечкә тоемлавы аша җиткерә алган Илгизәр Самакаев рәсем сәнгатенең башка жанрларында да үзен танытты.

И.Самакаевның тарихи темаларга ясалган картиналары сәнгать белгечләрендә аеруча кызыксыну уята.

Кылкаләм остасы үзе белдергәнчә, аны пейзаж жанры да дулкынландыра. Рәссам күңеленә Татарстан табигате дә, Казан урамнарының кабатланмас борынгы биналары да хуш килә. Илгизәр Самакаев иҗатында туган шәһәрнең йортлары үз холкы, үз йөзе белән мәңгеләшә.

Хәзерге вакытта рәссам республикабызның күләмле проектларында актив катнаша. Россия һәм Татарстан Рәссамнар берлеге оештырган күргәзмәләрдә аның күләмле картиналары һәрдаим урын ала.

Чыганак: http://intertat.ru/tt