Бүген Татарстанның халык рәссамы, Г.Тукай исемендәге дәүләт бүләге иясе Әнәс Тумашевның тууына 90 ел. Шушы уңайдан Г.Камал исемендәге дәүләт академия театрында данлыклы рәссамның күргәзмәсе ачыла.
Әнәс Ибраһим улы Тумашев 1924 елның 25 февралендә Татарстанның Чистай шәһәрендә дөньяга килә. 1938–1942 елларда Казан сәнгать училищесында укый. Бөек Ватан сугышы елларында заводта эшли. 1947–1953 елларда Әнәс Тумашев И.Е.Репин исемендәге Ленинград сәнгать, скульптура, архитектура институтында белем ала.

Ә 1953 елда Татарстанга әйләнеп кайта һәм Г.Камал исемендәге Татар дәүләт академия театрына эшкә урнаша. 20 елдан артык ул театрның рәссамы, декорацияләр куючысы булып эшли, башка театрлар өчен дә декорацияләр ясый. 1976 елдан Казанның В.Качалов исемендәге Зур драма театры баш рәссамы була. 1975–1980 елларда ТАССР Рәссамнар берлеге идарәсе рәисе булып тора.

Театрдан кала, Әнәс Тумашев нәкышчылык, аерым алганда табигать күренешләрен сурәтләргә һәм тарихи темаларга әсәрләр иҗат итәргә ярата ("Петр I Болгарда", "Бөек Болгар базары", "XX гасыр Казаны" һ.б.). Шуңа күрә 1985 елда театрдан киткәч, ул бөтен вакытын нәкыш сәнгатенә багышлый.

Әнәс Тумашев нәтиҗәле хезмәте өчен төрле мактаулы исемнәр яулый. Татарстанның атказанган сәнгать эшлеклесе, Татарстанның халык рәссамы, РСФСРның атказанган рәссамы исемнәрен ала, дип хәбәр итә Г.Камал театры сайты.

Г.Камал исемендәге Татар дәүләт академия театрында Кәрим Тинчуринның "Җилкәнсезләр" спектаклен бизәгәне өчен 1958 елда Г.Тукай исемендәге Дәүләт бүләгенә лаек була. Ә. Тумашевның хезмәтләре Япония, Германия, шулай ук Россия шәһәрләре музейларында саклана.

Чыганак: http://intertat.ru/tt