Казанда 12-14 февраль көннәрендә “Шаляпин укулары -2014” дигән россиякүләм фәнни конференция узачак. Мәгълүм булганча, мондый конференция ике елга бер оештырыла, биредә Феодор Шаляпин иҗатын өйрәнүчеләр җыела.

Опера башкару сәнгате осталыгын яңа югарылыкка күтәргән атаклы җырчы шәхесе белән сәнгать белгечләре генә түгел, ә башкалар да кызыксына. 1973 елдан М.Горький исемендәге мемориаль музей «Шаляпин укулары»н оештырып килә. Быел фәнни конференцияне Казан дәүләт мәдәният һәм сәнгать университеты һәм Н.Җиһанов исемендәге Казан дәүләт консерваториясе дә оештыра.

Конференция Россиядә Мәдәният елы һәм Беренче бөтендөнья сугышы башлануга 100 ел тулу уңаеннан уза. Нәкъ шушы вакыйга Россия тормышына сизелерлек үзгәрешләр кертә. Сугыш чорындагы кешеләр язмышы әдәбиятта, музыка һәм сәнгатьтә зур чагылыш таба.

«Трансформация личности и культуры во времена мировых кризисов и гуманитарных катастроф. К 100-летию со дня начала Первой мировой войны» дип аталган конференциядә Мәскәү, Чабаксар, Уфа, Ульяновск, Тольяттидан килгән фәнни оешма әгъзалары, шулай ук студентлар катнашачак.

Конференциянең пленар утырышы Казан дәүләт мәдәният һәм сәнгать университетында ачылачак. Тематик секцияләр Татарстан Милли музеенда да узачак.

Чыганак: http://intertat.ru/tt