Татар мәгарифе порталы
Сез монда
21 ноябрь көнне Татарстанның Милли музеенда «Яшьләрнең хезмәт адымнары» дигән күргәзмәнең ачылышы көтелә. Бу чара Татарстан студентлары хезмәт отрядлары хәрәкәтенең 50 еллыгына багышлана.
Безнең республикабызда төзелеш отрядлары барлыкка килү 1963 елга туры килә. Шул елда КИСИның 3 отряды Казахстан ССРның Целиноград өлкәсе Есильск районына төзелешкә китә. 1966 елда Татария студентлары төзелеш отрядларының беренче слеты була, ә 1967 елда студентлар төзелеш отрядларының республика штабы булдырыла.
Яңа ачылачак күргәзмәдә күп тарихи материаллар – фотографияләр, документлар, байраклар, плакатлар, курткалар, эш кораллары, комсомол юлламалары, значоклар, бүләкләр тәкъдим ителәчәк, дип хәбәр итә музейның матбугат үзәге. Алар Татарстан студентлар отрядлары хәрәкәтенең символикасы, гореф-гадәтләре, хезмәт энтузиазмы турында сөйли. Раритетлар арасында – студент отрядларының беренче командирлары – Котвицкий, Нәбиуллин, Рәхимҗанов документлары. Күргәзмә экспонатлары төзелеш, педагогика, авыл хуҗалыгы, сервис, экологик, медицина һәм башка отрядларның эшчәнлеге турында сөйли.
Күргәзмә ачылышында «Кешеләр үзләрен үзләре төзи» дигән китапның һәм республика студент отрядлары турындагы фильмның презентациясе булачак. Бу чарада Татарстанның Министрлар Кабинеты, Президент Аппараты, Мәдәният министрлыгы, Спорт, туризм, яшьләр эшләре буенча министрлык вәкилләре, Дәүләт Советы депутатлары, студентлар отрядлары ветераннары, республика слеты делегатлары катнашачак.
Презентациядә Татарстанның премьер-министры Илдар Халиков, мәдәният министры Айрат Сибагатуллин, Дәүләт Советы каршындагы Иҗтимагый яшьләр палатасы рәисе Евгений Ефимов катнашуы көтелә.
Чыганак: http://www.intertat.ru/tt