Быелның яз айларында коммерцияле булмаган “Татнетны үстерү фонды” дөнья күргән иде. Әлеге фонд Интернет челтәренең татар сегментын үстерү юнәлешендә эш алып барачак. 27 июнь көнне әлеге фондның Попечительләр советының беренче җыелышы үтте.

Фондның Попечительләр советына татар дөньясына таныш булган, татар телен, мәдәниятен, гореф-гадәтләрен саклау һәм ныгыту өстендә эш алып барган күренекле татар шәхесләре керделәр:

- Разил Исмәгыйль улы Вәлиев - депутат, Татарстан Республикасы Дәүләт Советы Президиумы әгъзасы, Мәдәният, фән, мәгариф һәм милли мәсьәләләр комитеты рәисе, "Мәгариф" милли проектын гамәлгә ашыруны тикшереп тору буенча Татарстан Республикасы Дәүләт Советы комиссиясе рәисе, татар язучысы, шагыйрь, күренекле җәмәгать һәм сәясәт эшлеклесе;

- Мифтахов Фәрит Фәиз улы – депутат, Татарстан Республикасы Дәүләт Советының Социаль сәясәт комитеты әгъзасы, “Болгар Синтез” ҖЧҖ генераль директоры, “Болгар” хәйрия фонды җитәкчесе;

- Вәлиев Римзил Салих улы - журналист, җәмәгать эшлеклесе;

- Юнысова Әлфия Туфан кызы - җәмәгать эшлеклесе, “Татар иле” мәгълүмати-ресурслы социаль челтәренең Конгресс бүлеге редакторы;

- Якупов Ильфир Илшат улы - Г.Камал исемендәге Татар дәүләт Академия театры директоры.

Попечительләр советы әгъзалары тәкъдиме белән әлеге советның рәисе итеп Ильфир Якупов билгеләнде.

Җыелышта шулай ук фондның 2013 елның II яртыъеллыгына планнары каралды һәм расланды. Татнетны үстерү фонды якын айларда Интернет челтәрендә татар телле сайтларның торышына анализ ясаячак, аның нәтиҗәләре нигезендә Татнетны ныгыту һәм дөньякүләм таныту юнәлешендә төрле чаралар күрәчәк.

Фондның директоры Раил Гатауллин белдерүенчә, Татнетка, ныгу өчен, бүгенге көндә Рунет һәм башка интернет зоналарының тәҗрибәсен яхшылап өйрәнергә кирәк. Татарларның күбесе Интернет челтәрендә татарча ресурслар барлыгын белмиләр. Күп кенә файдалы сайтлар юк кына проблемалар килеп туу сәбәпле дә (домен, хостинг өчен түләнмәү һ.б.) юкка чыгалар. Андый сайтларга һәм аларны ясаучыларга игътибар һәм ярдәм җитми. Бу юнәлештә көзгә таба нинди дә булса семинар оештырырга планлаштырабыз, дип белдерде ул.

Фондның Попечительләр советы җыелышында “Татар иле” (http://tatarile.org), “Татнет йолдызлары” (http://tatar.su), “Белем җәүһәрләре” (http://konkurs.belem.ru), “Габдулла Тукай сайты” (http://gabdullatukay.ru) кебек проектларны махсус координацияләү һәм үстерү, .tatar доменын таныту өстендә эш алып бару кирәклеге турында да фикер алышулар булды.

Гөлназ Талипова, “Белем.ру” порталы редакторы