Татар мәгарифе порталы
Сез монда
Самарада һәр елны бөек шагыйребез Габдулла Тукай туган көне алдыннан “Татар балалары җырлый” исемле фестиваль уздырылып килә.
Быел бу мәдәни чарага өлкәнең Елхау районында урнашкан Тупли авылыннан, Тольятти шәһәреннән һәм Самараның “Яктылык” мәктәбеннән укучылар катнашты. Балалар чыгышын Казан консерваториясендә белем алучы яшь җырчы Илүсә Хуҗина бизәде. Татьяна Максимова татар көйләрен оста уйнап тамашачыны таң калдырды.
Тамаша өч сәгать барды. Шул вакыт эченә шул кадәр күп мәгълүмат сыйдырылган иде ки, тамашачы талганлык сизмәде. Тантананы ачып җибәргәндә Наилә Сабирҗанова сөйләгәннәрдән кыскача фикерләр.
– Соңгы айларда бик куанычлы вакыйгалар булып узды. Төрле милләт яшьләреннән тупланган футбол такымнары арасында ярышлар узды. Дистәләгән такымны җиңеп беренче урынга Самара өлкә татар милли-мәдәни мохтарияте такымы беренче урынга чыкты. Мохтарият җитәкчесе – Минәхмәт Хәлиуллов. Егетләребезгә зур бүләкләр әзерләп куйдык.
Казанда узган олимпиадаларда “Яктылык” укучылары беренче урынны алдылар. Бер төркем татар мөгаллимнәренә мохтарият үзенең бүләкләрен әзерләде.
Һәр коллектив сәхнәдән үзенең үзенчәлеген күрсәтә алды. Тупли балалары самимилекләре белән аерылып тордылар. Тагын бер күзгә ташланган нәрсә: Тольяттидан тик татар балалары гына чыгыш ясаса, Тупли мәктәбеннән килгән урыс балалары татарча биеделәр. Мәктәп мөдире Рушания Зәкиева балаларга сәнгати тәрбия бирүгә зур көч куя.
Тольятти шәһәрендә татар балаларын туплап, аларны татар мохитенә кертеп җибәрүдә Галия Әбәзова уңышлы эшли. Үзе өч бала анасы буларак, улы Илгизне дә моңлы итеп җырларга өйрәткән. Ә инде орчык буйлы беренче сыйныф укучысы Азат Заһидуллин “Әссәләмәгаләйкем”не көйләгәндә нарасыйга сокланмаган кеше калмагандыр.
”Яктылык” укучылыры кайсы гына форматта чыгыш ясамасыннар, һәрберсе һөнәрмәннәр биеклегендә. Зур сәхнәне тутырып биегәндә колачлык күренсә, “Азан” әйткәндә буыннар чылбырының яшәвенә раслау булып кабул итәсең. Вокал белән янәшә борынгы мөнәҗәтне көйләү татарның “изм”нарга сүтелмәвенә ишарә. “Нур” мәдрәсәсе шәкертләре чыгыш ясап фестивальнең офыгын киңәйтеп җибәрделәр.
Һәр тамашаның чикләвек теше була. Бу юлы ул – Илүсә Хуҗина иде. Самара сәхнәсендә тулы концертта тик фортепианога гына кушылып җырлау әле булмаган хәл. Әсәрләре нинди бит! Рөстәм Яхин, Алмаз Монасыйпов, Мансур Мозаффаров, Александр Ключарев, Салих Сәйдәш, татар халык көйләре. Халык борынгы көйләрне онытмый. “Зөбәрҗәт”не йотлыгып тыңласалар, “Алтынчәч” операсыннан “Таңсылу ариозасын”могҗиза итеп кабул иттеләр. Гомердә татар операсын ишетмәгән тамашачы үзенә бер илаһи аһәңнәр дулкынына чумды. Көйне акапеллага башкару – җырчының сәләтен үлчәү бизмәне. Илүсә туташ “Салкын чишмә” җырын акапеллага башкарып тамашаны ачып җибәрде.
Фортепианода көйләрне Казан дәүләт консерваториясенең мөгаллимәсе Татьяна Максимова башкарды. Рус милләтеннән булган Татьяна – татар музыкасының югары белгече. Татарча сөйләгәннәрнең барчасын да тулысынча аңлый.
– Мин татар көйләренә мөкиббән. Татар җырлары югары бәягә ия. Мин аларны теләсә кайсы аудиториядә яратып башкарам. Татар классик композиторлары сокланырлык әсәрләр калдырдылар. Ул рухи байлыкны даими халыкка җиткезеп торырга кирәк. Тик классик музыка гына халыкның әхлакый офыгын киңәйтеп тора, эчке халәтенә шифа өсти. Моң – ул тик татарда гына. Самара татарлары классик композиторларны күздә тоталар. Залда балаларның күп булуы киләчәккә өмет уята, диде Татьяна Максимова.
“Татар балалары җырлый” фестивален Самара өлкә татар милли-мәдәни мохтарияте, Самара шәһәренең татар милли-мәдәни мохтарияте, “Туган тел” исемле Самара өлкә татар җәмгыяте оештырды.
Матди ярдәмне Самара өлкә администрациясе, Самара шәһәр администрациясе, татар эшбатырлары һәм Самара өлкә Дуслык йорты күрсәтте.