Татар мәгарифе порталы
Сез монда
Мәктәптә соңгы кыңгыраулар чыңлагач, алда күпләрегезне сюрприз көтә. 24 май көнне Казанның “Татнефть-арена” залында 11 нче сыйнфлар өчен “Соңгы кыңгырауның” шәһәр бәйрәме узачак.
Ишеткәнсездер, моңа кадәр биредә Дима Билан да чыгыш ясарга тиеш дигән имеш-мимешләр йөргән иде. Ләкин, беләсез, җырчы бу көннәрдә мөһимрәк планнар белән яна.
Ләкин бер дә артык борчылмагыз, Казанның 9355 чыгарылыш сыйныф укучысына хуш килердәй “йолдызлар” күп булачак. Моны Казан мэриясендә узган матбугат-конференциясендә шәһәр идарәсенең балалар һәм яшьләр эшләре комитеты җитәкчесе Дамир Фәттахов ышандырды.
Бу бәйрәмгә Казанның бар 11нче сыйныф укучысы да чакырылыган. Өстәвенә, юлламаны шәһәребез мәктәпләренең директорлары да алды. Димәк, “Татнефть-арена” быел 9355 кыз һәм малайны көтеп кала.
Гадәттәгечә, Казан шәһәре мэры Илсур Метшин 11ләргә мөрәҗәгать белән чыгачак. Шулай ук бәйрәм дәвамында “Чын дуслар”, “Россия бомонды киләчәге”, “Гадәти булмаган сыйныф”, Алтын йөрәкләр” кебек номинация җиңүчеләре игълан ителәчәк.
Ниһаять, бүләккә дә килеп җиттек. Быел 11не котларга «Бандерос» исемле танылган рус r&b-проекты чакырылган. Һәм бу юкка түгел. Ел дәвамында чыгарылыш сыйныф укучылары арасында махсус сораштыру үткәргәннәр. Янәсе “Соңгы кыңгырау” кичәсендә алар эстраданың кайсы җырчыларын күрергә тели. Беренче урынны Дима Билан ала. Ләкин “Евровидение-2008”дә катнашу сәбәпле ул Казанга килә алмый. Икенче урында – “Йолдызлар фабрикасының” 7 чыгарылышы. Тик бу тормышка ашмаслык хыял гына булып кала. Дамир Фәттахов сүзләренә караганда, 7 чыгарылышның яртысы грипп белән авырый икән. Нәтиҗәдә, Казанга “Бандерос” киләчәк. Ул укучылар төзегән хит-парадның 3 баскычын яулый.
Бәйрәмдә шулай ук башкалабызның иң шәп иҗади коллективлары һәм “Зур тәнәфес” шәһәр бәйгесе җиңүчеләренең катнашуы да көтелә.
“Соңгы кыңгырау”ның бер үзенчәлеге дә бар. Ел да кызлар чәчләренә ак бантлар тагып, заманында әниләре-әбиләре кигән ретро-күлмәкләр киеп килә икән. Мөгаен, бу традиция быел да үзгәрмәячәк.
"Татар-Информ" материаллары буенча әзерләнде.
- Караулар саны: 3979
- Бастыру