Шыгырдан – Россиянең Чуашстан Республикасы Батыр районындагы иң зур татар авылларыннан берсе. 583 гектар җирне биләп торган әлеге авылда 5 меңнән артык кеше яши, барлыгы – 1478 шәхси хуҗалык исәпләнелә.

Шыгырданга 1620 еллар азагында нигез салынган. Бу якларга Касыйм ханлыгыннан йомышлы татарлар килеп урнашкан. 1708 елда Петр I керткән губерна реформасы вакытында Казан губернасы оештырыла, ә 1770 елда 13 өяздән торган Сембер наместниклыгы барлыкка килә. Шыгырдан авылы Буа өязенә керә. 1868 елда авылда 2276 кеше исәпләнелә. 1920 елда Шыгырдан Чуашия автоном өлкәсенә кертелә (1925 елдан – Чуашия АССР).

Легендар очучы Валерий Чкалов Шыгырдан авылыннан РСФСРның Югары Советы депутаты итеп билгеләнгәннән соң 1939 елда авыл Чкалов исемен йөртә башлый. 1994 елның 19 гыйнварында Чуашстан Республикасы Югары Советы Президиумы Указы белән Шыгырданга тарихи исеме кайтарыла.

Шыгырданда җиде мәчет эшли. Аның җиденчесе 2010 елның 20 июнендә ачыла. Өч сәхабә исемендәге Үзәк Җәмигъ мәчет Изге Болгар җирендәге борынгы җимерек Җәмигъ мәчет бинасына охшатып төзелгән. Яңа мәчеткә Мөхәммәт пәйгамбәрнең Идел буе җирләрендә ислам динен тараткан сәхабәләре хөрмәтенә "Өч сәхабә мәчете" дип исем кушыла.

Шыгырдан авылындагы Габдулла Тукай урамының бер очы Өч сәхабә мәчетенә чыга.

Чыганак: http://gabdullatukay.ru