Казахстан татар яшьләре хезмәттәшлеккә чакыра. “Казахстан, Үзбәкстан, Россия, Татарстан, Финләндия, Төркия, Кытай, Америка һәм башка илләрнең татар яшьләре белән бергәләп очрашулар, чаралар уздырырга телибез. Туган халкын яратканнарны кызыксындырырлык халыкара проектларыбыз бар”, - дип хәбәр итә Казахстаннан Эльвира Габдуллина.

“Зыялы кеше һәрвакыт үзенең туган телен белергә омтыла. Бу аның зыялылык билгесе. Чын татар зыялысы кайда гына яшәсә дә - Казахстанда, АКШ та, Германиядә яки Финләндиядәме – туган телен өйрәнергә һәм белергә тиеш. Әмма бүгенге заманда яшьләрнең туган телләрен белмәү, тарихларын оныту проблемасы бар. Шулай да төшенкелеккә бирелергә кирәкми. Чөнки бу проблеманы төрле үзәкләр, җәмгыятьләр оештырып чишәргә омтылалар”, - дип яза Эльвира. Әйтик, аның туган җире - Казахстанның Шымкент шәһәрендә бер ел элек татар яшьләр җәмгыяте оештырылган. Әйдәп баручылары Тимур Абдуллин, Дамир Абдуллов, Диана Гайфуллина һәм шулай ук Азия татар яшьләре советы вәкилләре Зәйнулла Ибраһимов һәм Нариман Кәримов ярдәмендә яшьләр үзара берләшеп иҗтимагый тормышта актив катнаша башлаганнар. Иң куандырганы - татар теле, тарихы, сәнгатьле сөйләм һәм ислам нигезләре түгәрәге эшли икән. Укулар һәр якшәмбедә 3 сәгать дәвам итә. Татарча китаплар тупланган китапханәләре булуы да шатландыра.

“Безнең башлангыч дәвамлы булуга ышанабыз, чөнки максатыбыз бар: туган телебезне һәм тарихыбязны өйрәнү”, - ди Эльвира һәм дөнья күләмендә сибелеп яшәүче татар яшьләрен үзара хезмәттәшлеккә чакырып кала.

Чыганак: http://intertat.ru