Башкортстан татар яшьләре Уфада чираттагы киңәшмәсен үткәрде. Анда яңарак Казанда узган Бөтендөнья татар яшьләре формуы йомгаклары тикшерелде.

Башкортстан татар яшьләре дә милли-мәдәни тормышның үзәгендә булырга җыена. Уфада узган җыелышта катнашучылар шул фикерне еш кабатлады.

Башкортстан татар яшьләренең бер төркеме яңа гына Казаннан әйләнеп кайтты. Бөтендөнья Татар яшьләре форумында катнашты алар. Әлеге сәфәрне “Хәзинә” исемле сәяхәтләр оештыру ширкәте җитәкчесе Камил Сираҗетдинов әзерләде һәм вәкиллеккә җитәкчелек итте. Камил әфәнде Башкортстан Татар конгрессы Башкарма комитетының яшьләр эшләре комиссиясен җитәкли. Башкортстанда “Азатлык” татар яшьләре берлеге, хакимиятләр басымы астында, үз эшен берничә ел элек туктатырга мәҗбүр булгач, соңгы вакытта татар яшьләрен нәкъ менә Камил Сираҗетдинов бергә туплый башлады.

Әле Казаннан татар яшьләре форумыннан Уфага әйләнеп кайткан яшьләр һәм башка активистлар, шушы җыен хакында фикерләшергә һәм киләчәккә уй-ниятләр корырга дип җыелыш үткәрде. Чәй табыны артында узган сөйләшү бик иркен һәм җанлы барды. Әлеге очрашуга Бөтендөнья Татар конгрессының Башкортстандагы даими вәкиле Алик Локманов та килде.

Сөйләшү башында Камил Сираҗединов Бөтендөнья татар яшьләренең 4нче җыены хакында фикерләре белән уртаклашты, аның файдасы, уңай нәтиҗәләре турында сөйләде. “Хәзерге ашкынулы заманда яшьләр тәвәккәлрәк булырга тиеш, вак-төяк чаралар оештыру өчен дә кемнәндер ярдәм сорап йөрергә тиеш түгел”, - дигән уртак фикер еш яңгырады”, - ди Камил Сираҗетдинов.

Камил Сираҗетдинов татар яшьләре белән сөйләшүдә алда торган бурычларга да тукталды. “Әлеге көндә иң төп эшебез халык исәбен алуга әзерлектә һәм аны үткәрүдә актив катнашуыбыз, - диде Камил Сираҗетдинов. - Әлеге кампаниядә катнашуның төрле юлларын файдалану кирәк. Районнардагы яшьләребез дә бу эшкә җәлеп ителсен, аеруча татар укытучылары, иҗади зыялылар аңлату эшләрен алып барса яхшы булыр”.

Җыелышта фикер алышуда катнашкан егет-кызлар да алдагы чорда башкарыласы эшләр хакында үз теләк-тәкъдимнәрен әйтте. Төп тәкъдим – Башкортстан Татар яшьләренең “Азатлык” оешмасын яңадан тергезү булды. Хәзер аны тиз арада тормышка ашыру өчен тәгаен эшләр башланачак, дип әйтелде.

Чыганак: http://tat.tatar-inform.ru