Татар мәгарифе порталы
4 Апрель, 2008 - 18:17
Россия Федерациясенең Мәгариф һәм фән министрлыгы хөкүмәткә яңа закон проектын тәкъдим итәргә әзерләнә. Киләчәктә әлеге закон кабул ителсә, мәгариф өлкәсендә эшләүче хезмәткәрләр үз бурычларын тиешле дәрәҗәдә башкармый икән, аларны административ җәза көтәчәк. “Административ хокук бозулар турында” Кодекска үзгәртүләр кертелү турында статс-секретарь – мәгариф һәм фән министры урынбасары Юрий Сентюрин Дәүләт Думасында узган “Бердәм Россия” фракцияснең утырышында ассызыклады.
Сентюрин сүзләренә караганда, югары уку йортлары укытучылары өчен иң катгый җәза – билгеле бер вакыт аралыгында аларның укыту эшчәнлеген туктатып тору карары булырга мөмкин. Бүген Хезмәт Кодексы нигезендә суд тарафыннан җинаять кылган, дип табылган һәм сәламәтлек белән проблемалары булган затлар гына укыту процесыннан азат ителә ала. Россия Федерациясенең Мәгариф һәм фән министрлыгы бу исемлекне зурайтырга уйлый. Җәза педагогик эшенә, үз вазыйфаларына битарафлык күрсәткән белгечләрне генә түгел, ә күптөрле “аферистларга” да яный. Мисал өчен, ялган диплом әзерләүчеләр, шул исәптән бу эш белән мавыгучы югары уку йортлары җитәкчеләре дә алга таба хокук оешмалары алдында җавап тотарга мөмкин.
Чыганак: http://mon.gov.ru/