Россия мәгариф системасында Бердәм дәүләт имтиханы төпле урнашты. Аны нигезләүче кануннар кабул ителгән, БДИны уздыру тәҗрибәдән чыгарылыш сыйныф укучыларының реаль чынбарлыгына әверелде, дәреслекләр, барлык фәннәрдән дә контроль-үлчәү материалларына кытлык кичермибез. Кыскасы, түрәләр әйтмешли, БДИ “чын-чынлап һәм озакка” килде.

Әйе, җитешсезлекләр дә буа буарлык. Шул ук милли республикаларда БДИны туган телдә тапшыру һәм алар нәтиҗәсе нигезендә югары уку йортларына керү мәсьәләсе әле ачыкланып бетмәгән. Көрәш бара. Шул ук вакытта башка тарафта да тик утырмыйлар. Бүген, 17 нче февраль көнне, Россия Фелдерациясенең Дәүләт думасы КПРФ депутатлары тәкъдим иткән закон проектын карарга тиеш. Әлеге документ авторлары БДИны чикләүгә ирешәселәре килә. Алар фикеренчә, 11 нче сыйныф укучысы чыгарылыш имтиханнарын үзе теләгән формада бирергә хокуклы. Я ул БДИны, я сынауның традицион (телдән һәм язма имтиханнар) төрен сайлый ала. Дәүләт думасының мәгариф буенча комитеты башлыгы урынбасары Олег Смолин (КПРФ) сүзләренә караганда, көн кадагында куелган закон проекты “әдәбият”, “тарих”, “җәмгыять белеме” кебек фәннәрдән БДИны үткәрмәскә тәкъдим итә.

Дәүләт думасының мәгариф буенча комитеты исә палатадан әлеге закон проектын кире кагуны сорый. Комитет башлыгы Григорий Булыхин аңлатуынча, яңа закон проекты “бердәм дәүләт имтиханының концептуаль нигезләрен инкарь итә”. Григорий Булыхин ассызыклавынча, бу очракта абитуриентларның белемнәренә объектив рәвештә бәя бирү мөмкинлеге югалачак.