Татар мәгарифе порталы
Яр Чаллы шәһәренең Башкарма комитеты, Шәһәр Советы депутатлары, предприятия һәм оешма җитәкчеләре чыгымнарны киметү юлларын эзли. Кайбер мәсьәләләр буенча алга китеш тә бар икән.
Контроль-хисап палатасы “Үзәкләштерелгән китапханәләр системасы” муниципаль оешмасы эшчәнлеген тикшергән. Палата рәисе Татьяна Шливе яңгыраткан мәгълүматларга караганда, шәһәрдә эшләүче 25 китапханәнең 19ы торак йортларда урнашып, аерым керү ишекләреннән дә мәхрүм. 9 филиал исә бер-берсенә бик якын эшли. Әйтик, кайбер подъезда берьюлы ике китапхнә исәпләнә. Яр Чаллы шәһәренең китапханәләр системасы фондында 774 мең данә китап исәпләнә. Соңгы елларда фонд република бюджеты хисабына тулыландырылган. Яр Чаллыда китапларның 11 проценты мораль яктан искергән һәм таушалган.
Татьяна Шливе чыгымнарны оптимальләштерү юлларын тәкъдим итте. Моның өчен мәктәп һәм балалар китапханәләрен берләштерергә, фондларны яшьләр идарәсенең ял итү һәм күңел ачу оешмаларында (яшьләр үзәкләре) урнаштырырга була. Башкарма комитет рәисе урынбасары Рамил Хәлимов та идеяне хуплап чыга. Аның фикеренчә, мәгариф оешмаларында әлеге фондларны урнаштыру һәм уку залларын җиһазландыру мөмкинлеге бар. Өстәвенә, бу мәктәпләрдә өстәмә чыгымнар таләп итми.
“Үзәкләштерелгән китапханәләр системасы” китапханәләрне яшьләр үзәкләренә күчерү вариантына каршы түгел. Чөнки китапханәләр дә, яшьләр үзәкләре дә ял итү һәм күңел ачу оешмалары рәтенә керә.
Мәсьәлә бер айдан хәл ителәчәк.