Мөгаллимнәр һәм уку алдынгылары БДИ яклы, начар билгеләргә укучылар һәм стресска җиңел бирелүчән кызлар-егетләр исә Бердәм дәүләт имтиханына каршы, дип белдерә Җәмәгать фикерен өйрәнү бөтенроссия үзәге күптән түгел уздырган тикшеренүләргә нәтиҗә чыгарып.

26нчы майдан 19нчы июньгә кадәр Россиянең барлык чыгарылыш сыйныф укучылары быел беренче тапкыр Бердәм дәүләт имтиханын мәҗбүри рәвештә бирәчәк. Җәмәгать фикерен өйрәнү бөтенроссия үзәге чыгарылыш сыйныфлар, ата-аналар, педагоглар өчен бер төркем фокус-группа (сораштыру төре) үткәрә.

Нәтиҗәләр буенча, имтиханны уку алдынгылары һәм абый-апалары БДИ тапшырып өлгергән укучылар яклый. Шулай ук сынауны үз һөнәри осталыкларын үстерергә теләгән педагоглар, мәктәптәге йомгак аттестациясен уздырганда һәм югары уку йортларына укырга кергәндә ришвәт бирүне бетерү яклылар хуплый.

“Элек ничек иде? Имтиханнар үткән, ә укытучылар берничә көн дәвамында укучыларның эшләрен язып бетерә. БДИ исә мондый мөмкинлекне бөтенләй бетерде”, - дигән сорыштыруда катнашкан педагогларның берсе. Бердәм дәүләт имтиханы билгеле бер көндә, билгеле бер вакыт аралыгында, алдан билгеләнгән урында үтә. Бары нинди сынаулар эләгүен генә белү мөмкин түгел.

Сынауның мондый төрен кайбер ата-аналар да яклый. Алар фикеренчә, БДИ югары уку йортына укырга керү мөмкинлеген арттыра. БДИ рәвешендәге имтихан укытучыларның квалификациясен, укучыларның укуга карата җаваплылыгын арттыра, ди алар.

БДИга кемнәр каршы? Күчерү мөмкинлеге булмау сәбәпле, начар билгеләргә укучылар БДИга каршы. Һәрхәлдә, сораштыру шундый нәтиҗәләр чыгарган. Педагоглар арасында да андыйлар бар. Бу – белем бирүдә иске методлар кулланып эшләүчеләр. БДИ турында тиешенчә һәм җитәрлек хәбәрдар булмаган мөгаллимнәр дә очрый икән.

Ләкин “Единое окно”да китерелгән әлеге сораштыру нәтиҗәләре арасында никтер БДИга каршы булган башка бер төркем аталмаган. Мөгаен, җавап бирүчеләр арасында БДИны үз туган телендә бирергә теләүчеләр дә булгандыр. Ә андыйлар күп, милли республикалар бер Татарстан гына түгел.